Një raport i publikuar nga Rrjeti i Grave Gazetare të Kosovës (RrGK) ndriçon sfidat me të cilat përballen gratë gazetare në Kosovë.
Ky raport trajton pabarazitë gjinore në mjediset e punës dhe gjatë raportimit në terren.
Autoret, Getoarbë Mulliqi, Artiola Babuni së bashku me eksperten nacionale, Leonida Molliqaj, u fokusuan në tri çështje kryesore: ngacmimin seksual në punë, sfidat për të balancuar përgjegjësitë profesionale dhe personale, si dhe rreziqet e sigurisë që gratë përjetojnë në punë dhe jashtë redaksive, shkruan Katror.info.
Mundesh me e lexu edhe…
Secila prej këtyre çështjeve ka nëntemat e veta specifike të cilat shoqërohen me gjetje që shfaqin situatë jo të kënaqshme të grave gazetare në Kosovë.
Sipas raportit, ngacmimi seksual mbetet problem shqetësues. Rastet shpesh raportohen rrallë për shkak të frikës nga hakmarrja dhe mungesës së reagimit efektiv nga organizatat mediatike, duke krijuar një mjedis armiqësor.
Balancimi i punës dhe jetës familjare është gjithashtu sfidë. Gjetjet e këtij raporti, paraqesin orarin jo fleksibël dhe stigma për pushimet e lidhura me shëndetin ose kujdesin familjar kufizojnë avancimin profesional të grave gazetare dhe ndikojnë negativisht mirëqenien e tyre.
Gjithashtu, theksohen rreziqet jashtë redaksive që përfshijnë ngacmime fizike dhe verbale gjatë raportimit në terren. Këto rreziqe kufizojnë autonominë profesionale të grave, duke i përjashtuar ato nga raportimet e rëndësishme dhe duke ulur diversitetin në media.
Ndërsa, paragjykimi gjinor mbetet një nga sfidat e vazhdueshme me të cilat përballen gratë gazetare,
veçanërisht kur bëhet fjalë për avancimin në karrierë. Sipas gjetjeve të raportit, pavarësisht kualifikimeve, përvojës dhe performancës së barabartë apo edhe të dalluar, gratë shpesh anashkalohen për role udhëheqëse
ose detyra me profil të lartë.
”Shumë organizata mediatike ende i përmbahen normave tradicionale shoqërore që lidhin autoritetin dhe udhëheqjen me burrat, duke mënjanuar gratë nga rolet vendimmarrëse”, thekson raporti.
Sipas metodologjisë së raportit, të dhënat janë marrë nga dy fokus grupe, secili me nga 12 pjesëmarrës nga media të ndryshme anembanë Kosovës.
”Pjesëmarrësit u zgjodhën për të përfaqësuar një shumëllojshmëri të llojeve të mediave, duke përfshirë platformat publike, transmetuese dhe online. Grupi i parë i fokusit diskutoi sfidat me të cilat përballen gratë brenda redaksive, të tilla si paragjykimet gjinore, mundësitë e kufizuara të rritjes së karrierës dhe ngacmimet në vendin e punës. Grupi i dytë u fokusua në shqetësimet e sigurisë që përjetojnë gratë gazetare gjatë raportimit në terren, duke përfshirë ngacmimet, kërcënimet dhe dhunën fizike. Këto diskutime krijuan një mjedis të hapur ku pjesëmarrësit shkëmbyen lirshëm përvojat dhe idetë e tyre për përmirësim”, thuhet në raport.
Fokus grupet u udhëhoqën nga Qendresa Tershani dhe Leonida Molliqaj të cilat siç thueht u siguruan që të
gjithë pjesëmarrësit të kishin mundësinë të flisnin.
Aty theksohet se janë përdorur një kombinim i pyetjeve të strukturuara dhe të hapura për t’u thelluar në përvojat e pjesëmarrësve. Fokus grupet u regjistruan dhe u transkriptuan për të marrë të gjitha komentet për analiza të mëvonshme. /Katror.info
Për më tepër lexoni raportin e publikuar nga Asociacioni i Gazetarëve të Kosovës duke klikuar këtu.
Përgatiti:
