Transportuesit e Komunës së Podujevës kanë protestuar gjatë gjithë natës para Komunës së Prishtinës, kundër vendimit për ndalimin e hyrjes së tyre në kryeqytet pa asnjë njoftim paraprak. Pavarësisht qëndrimit të tyre paqësor, zyrtarët policorë u kanë shqiptuar gjoba, raportoi Ekonomia Online.
Sipas Mentor Mustafës, përfaqësues i Shoqatës së Transportit Podujevë – Prishtinë, ky vendim ka krijuar një situatë të papranueshme për qindra mijëra udhëtarë që përdorin këtë linjë çdo ditë, përfshirë studentë, nxënës dhe punëtorë.
“Na është bërë një shkelje ligjore. Dokumentet e Ministrisë së Infrastrukturës tregojnë oraret dhe itinerarin tonë, por Komuna e Prishtinës ka marrë një vendim pa pëlqimin tonë për të na ndaluar qarkullimin. Si rezultat, mbi 100 mijë udhëtarë në ditë kanë mbetur në rrugë. Nuk po merr askush përgjegjësi,” tha Mustafa.
Protestuesit u përballën edhe me gjoba të shumta nga Policia e Kosovës, me secilën që kushton nga 100 deri në 300 euro.
“Nuk na lanë të parkohemi as te ‘Xhamia e Llapit’, edhe pse kemi leje zyrtare. Në mëngjes na kanë lënë përsëri gjoba. Kjo është e padrejtë për qytetarët e Podujevës, sepse fluksi më i madh i pasagjerëve nga jashtë Prishtinës vjen nga komuna jonë. Kjo është e papranueshme,” shtoi ai.
Transportuesit paralajmërojnë se protesta do të vazhdojë deri në gjetjen e një zgjidhjeje dhe anulimin e vendimit që i pengon të operojnë normalisht në kryeqytet./Katror.info
Përgatiti:
