I dërguari i posaçëm i BE-së për dialogun mes Kosovës dhe Serbisë Peter Sorensen pritet të qëndrojë në Kosovë javën që vjen, nga 17 deri me 19 Mars, në vizitën e tij të parë prej kur mori këtë post duke e zëvendësuar paraardhësin e tij Mirioslav Lajçak.
Sorensen do të vizitojë Kosovën për të përgatitur vazhdimin e procesit të dialogut në kuadër të së cilit për muaj nuk ka pasur lëvizje. Ndër temat e para që do të mund të diskutohen është zbatimi i deklaratës për të pagjeturit, për të cilën palët kishin rënë dakord, por takimi i fundit në Bruksel në nivel të ekspertëve kishte dështuar, shkruan KOHA.
Nga ana tjetër përfaqësuesja e re e lartë e BE-së Kaja Kallas ka thënë para disa javësh që gjatë muajit mars do të shikojnë se si të ecet përpara në procesin e dialogut duke përmendur po ashtu edhe faktin se ka kritika ndaj formatit të deritashëm të këtij procesi.
Mundesh me e lexu edhe…
Në BE vazhdojnë të thonë se nuk do të heqin dorë nga kërkesat që si Kosova ashtu edhe Serbia t’i përmbushin obligimet e tyre që kanë dalë nga procesi i deritashëm i dialogut, e kjo përfshinë zbatimin e të gjitha marrëveshjeve të arritura deri me tash.
Diplomatët në BE janë kureshtarë për të parë se si do t’i qasen këtij procesi përfaqësuesja e lartë Kaja Kallas dhe i dërguari i posaçëm Peter Sorensen. Por të njëjtit thonë se në këtë moment, përderisa është e paqartë se kur dhe si do të formohet qeveria e Kosovës, ndërsa situata edhe në Serbi është „sfiduese“ me protestat e studentëve dhe me një qeveri formalisht në dorëheqje, nuk është reale të pritet ndonjë progres në procesin e dialogut.
Kosova dhe Serbia, së paku kështu vazhdon të thotë BE-ja, kishin arritur në muajin shkurt të vitit 2023 në Bruksel “Marrëveshjen për rrugën drejt normalizimit të raporteve” dhe më vonë në një takim në Ohër edhe aneksin për implementimin e saj. Por dy vjet më vonë nuk ka asnjë lëvizje në zbatimin e saj. Serbia për më tepër ka dërguar një letër në BE ku shprehet qartë se nuk do t’i zbatoi pjesët kryesore të asaj Marrëveshje. Këtë letër e kishte dërguar ish-kryeministrja e Serbisë Ana Bënabiq. Më vonë ish-i dërguari i posaçëm për dialog Miroslav Lajçak kishte thënë se “ajo letër është tërhequr” por tërheqja e saj asnjëherë nuk ishte konfirmuar. Serbia ka vazhduar të mos e zbatojë atë, përfshirë edhe me veprimet në Këshillin e Evropës ku ka kundërshtuar përpjekjet e Kosovës për t’u anëtarësuar në këtë organizatë, qoftë edhe pjesëmarrjen në punimet e Komitetit në cilësinë e mysafirit.
Nga ana tjetër BE-ja vazhdon ta kritikojë Kosovën për ato që i quan “veprime të njëanshme dhe të pakoordinuara” në veri dhe për mungesën e gatishmërisë për nisjen e procedurës për themelimin e Asociacionit të komunave me shumicë serbe.
Sorensen, sipas burimeve diplomatike, kësaj radhe nuk do ta vizitojë Serbinë, por këtë do ta bëjë në një rast tjetër. Kjo arsyetohet me “çështjet e agjendës”./Katror.info
Përgatiti:
