Viti i kaluar është shënuar me pengesa të mëdha, mungesë veturash, por edhe inflacion dhe rritje të ndjeshme të çmimeve në tregjet e veturave në mbarë botën.
Kjo shkaktoi rezultate më të dobëta, por vërehen edhe disa shenja rikuperimi. Revista Motor1.com, ka publikuar analizën e detajuar të shitjes së veturave të reja në mbarë botën.
Kështu, Kina është ende tregu më i madh i veturave në botë, dhe vitin e kaluar ishte mjaft i mirë duke marrë parasysh sfidat globale.
Mundesh me e lexu edhe…
Sasia e veturave të shitura u rrit me 2 për qind, në një total prej 26.86 milionë vetura, krahasuar me vitin 2021.
Ky rezultat është edhe më i mirë se në vitin 2019, para pandemisë. Pjesa më e madhe e rritjes është nxitur nga veturat elektrike, të cilat kanë një nxitje të fortë nga qeveria qendrore.
Sipas të dhënave paraprake, këto automjete përbënin 20 për qind të shitjeve totale dhe Wuling Hongguang Mini EV hyri në tre modelet më të shitura, ndërsa BYD Song Plus kryesoi listën me 459,424 njësi të shitura.
Tregu i dytë më i madh ishte ai i SHBA-së, i cili ishte më i ekspozuar ndaj presioneve inflacioniste dhe rritjes së normave të interesit.
Shitjet e veturave arritën në 13.83 milionë, 8 për qind më pak nga viti 2021 dhe më e ulëta që nga viti 2012.
Pavarësisht rezultateve negative, blerësit vazhduan të kalojnë nga limuzina dhe minifurgonët në SUV dhe kamionë, kurse Tesla vazhdoi të rritë aksionet.
Megjithatë, veturat elektrike ende përbëjnë një pjesë të vogël të totalit, me Ford F-Series që mban vendin e parë me 653,957 njësi, e ndjekur nga Chevrolet Silverado në vendin e dytë dhe pickup RAM në të tretin.
Në Evropë, situata është e ngjashme me atë në SHBA. Të dhënat për katër tregjet më të mëdha (Gjermania, Britania e Madhe, Franca, Italia dhe Spanja), që përbëjnë rreth 75 për qind të të gjithë rajonit, tregojnë se rënia e tregut nuk ka të ndalur.
Në vitin 2022, shitjet arritën në 9.05 milionë vetura, që është 6 për qind më pak në krahasim me vitin 2021. Vëllimi u ul me 7 për qind në krahasim me vitin e pandemisë (2020) dhe 29 për qind në krahasim me 2019.
Në Gjermani, Volkswagen triumfoi sërish me tri vetura të pozicionuara në tri vendet e para. Në Francë, dominimi i Grupit Renault u thye me një fitues të ri të shitjeve të vendit të parë. Peugeot 208 u shit në 88,812 njësi.
Në katër vjet, tregu humbi më shumë se 3.7 milionë vetura të shitura. Situata është praktikisht e njëjtë në pesë vende. Franca dhe Italia shënuan rënien më të madhe në krahasim me vitin 2021, ndërkohë që tregu gjerman mbeti i qëndrueshëm.
Megjithatë, të gjitha ato shënuan rënie dyshifrore mes viteve 2019 dhe 2022. Mungesa e veturave të reja në sallone dhe rritja e kostove të jetesës, pjesërisht për shkak të krizës energjetike, shpjegojnë situatën kritike.
Së fundi, situata në Spanjë është interesante, ku Hyundai Tucson zuri vendin e parë me 21,985 njësi të shitura në total, e ndjekur nga Dacia Sandero në vendin e dytë dhe Seat Arona në të tretin.
Ndryshe nga Amerika dhe Evropa, situata në Australi, Indi, Indonezi dhe Turqi është mjaft e mirë. Jo vetëm që vëllimi i tregut u rrit midis 2021 dhe 2022, ai ishte më i madh se sa ishte dy apo tri vjet më parë.
Australia, në veçanti, ka parë triumfin e veturave që bëjnë tërheqje me të katër rrotat. Toyota Hilux ishte në vendin e parë, me gjithsej 64,391 njësi të shitura, e ndjekur nga Ford Ranger (47,479) dhe Toyota RAV4 (34,845)./Katror.info
Përgatiti:
