Kitaristi klasik shqiptar, Petrit Çeku, ka performuar të enjten, në Ditën Ndërkombëtare të Muzeve, në Muzeun e Mitrovicës, duke u ofruar një përvojë ndryshe vizitorëve.
Në këtë performancë ai interpretoi të gjitha Suitat e shkruara për violonçel nga kompozitori Johann Sebastian Bach e të transkriptuara për kitarë nga Valter Deshpali, instrumentist virtuoz e pedagog i cili u nda nga jeta muajin e kaluar.
”Suitat e Bachut janë të njohura për kompleksitetin e tyre teknik dhe thellësinë emocionale. Shfaqin kuptimin e tij të thellë të formave muzikore dhe aftësinë për të ngjallur një larmi emocionesh. Interpretimi i tyre në kitarë nga Petrit Çeku e çoi publikun në një udhëtim që nis me momente të gjalla dhe plot hare e deri tek pasazhet introspektive dhe melankolike duke kapur thelbin e emocionit dhe përvojës njerëzore. Në njëfarë forme, koncerti ka qenë edhe homazh për maestron Valter Deshpali”, përshkruan kështu Koha.net.
Mundesh me e lexu edhe…
Pak kohë më parë Petrit Çeku u shpall fitues i çmimit “Porin” në kategorinë “Interpretimi më i mirë klasik për interpretimin e ‘Ommagio a Marko Ruždjak, Op. 17’ nga Goran Listeš”, botuar nga “Croatia Records”.
Petrit Çeku është një instrumentist virtuoz që ka realizuar bashkëpunime me emrat më të njohur të instumentistëve botërorë.
I njëjti koncert do të mbahet edhe në Prizren, më 20 maj, në Katedralen “Zoja Ndihmëtare”. /Katror.info
Përgatiti:
