Lionel Messi arriti me shumë stil te Inter Miami. Yllit argjentinas iu nevojit pak më shumë se gjysmë ore në fushë për të filluar të bënte diferencën për skuadrën aermaike, pasi goditja e tij e lirë i dha atyre një fitore në minutat e fundit ndaj Cruz Azul në ndeshjen hapëse së Kupës së Ligës.
Në atë ndeshje, 36-vjeçari luajti vetëm 36 minuta, por trajneri Tata Martino tashmë ka konfirmuar se roli i tij së shpejti do të rritet. Argjentinasi konfirmoi se Messi dhe Sergio Busquets do të luajnë më shumë në ndeshjen e ardhshme.
“Ka shumë gjasa që Leo dhe Busi të luajnë më shumë minuta, qoftë edhe nga fillimi”, deklaroi Martino. “Ne të gjithë e dimë se kur Leo fillon, ai gjithmonë luan 90 minutat e plota, kështu që gjithçka varet nga mënyra se si ndihet”.
Mundesh me e lexu edhe…
Ndikimi i Messit, sipas fjalëve të Martinos, nuk ka vonuar të reflektohet në dhomat e zhveshjes.
“Në minutat e para ne dukeshim si një skuadër fillestare, por pasi Leo dhe Busi hynë në fushë, lojtarët menduan se ata që erdhën do t’i mbronin dhe kjo është mirë sepse ata po rriten përkrah tij dhe ndjejnë një mbështetje shumë të rëndësishme”, theksoi ai, përpara se të sugjeronte se Messi “do të jetë kapiteni i ekipit”.
Pavarësisht euforisë pas fitores së fundit, Martino paralajmëroi për rreziqet e kundërshtarëve të tyre të ardhshëm, Atlanta United, të cilët kanë në radhët e tyre fituesin e Kupës së Botës, Thiago Almada.
“Atlanta është e trajnuar shumë mirë”, shtoi ai. “Koha e Gonzalos në krye është e rëndësishme dhe ata kanë një lojtar të jashtëzakonshëm si Thiago për të parë”./Katror.info
Përgatiti:
