Regjisorja Greta Gerwig ka zbuluar se aktualisht nuk ka në plan të xhirojë vazhdimin e filmit mega hit Barbie.
Në një intervistë për The New York Times, regjisorja shprehu mendimin e saj për filmin e saj të fundit dhe nëse ai mund të jetë fillimi i një ekskluziviteti kinematografik. “Ndihem kështu në fund të çdo filmi, sikur nuk do të kem kurrë një ide tjetër dhe gjithçka që kam dashur të bëj, e kam bërë. Nuk do të doja t’i prishja ëndrrën askujt, por për mua në këtë mmoment mundësia për xhirimin e një vazhdimi është zero,” tha Gerwig.
Barbie ka thyer disa rekorde në arkë që nga premiera e saj javën e kaluar. Filmi fitoi 155 milionë dollarë në SHBA, hapja më e madhe e brendshme e vitit 2023, dhe filmi gjithashtu shënoi fundjavën më të mirë të hapjes për një regjisore femër. Pop Crave pretendon se Barbie ishte gjithashtu hapja më e madhe për një film me lodra, hapja më e madhe ndonjëherë për Margot Robbie dhe Ryan Gosling dhe hapja më e madhe për një film që nuk është një vazhdim, xhirim ose film për superheronjë.
Diku tjetër në intervistë, Gerwig, e cila jo vetëm drejtoi filmin, por e shkroi atë me partnerin e saj Noah Baumbach, tha se ishte “e pafjalë” për histerinë që rrethonte filmin Barbie.
“Isha në Nju Jork dhe kalova të enjten dhe të premten vetëm duke kontrolluar kinema të ndryshme dhe duke u siguruar që fotografia të dukej e bukur dhe duke u përpjekur të heq dorë nga kontrolli, gjë që është e vështirë. Por sinqerisht, ishte e mrekullueshme të ecje përreth dhe të shihje njerëz në rozë. As në ëndrrat e mia më të çmendura nuk e imagjinoja diçka të tillë”, tha Gerwig.
Gerwig aktualisht është duke punuar në një film tjetër të shumëpritur – Borëbardha. Gerwig shkroi skenarin për përshtatjen e fundit të princeshës së Disney-t, me aktoren Rachel Zegler të West Side Story. Asaj do t’i bashkohet Gal Gadot si Mbretëresha e Keqe, Ansu Kabia si Gjuetari dhe Martin Klebba.
Filmi do të drejtohet nga Marc Webb, i cili më parë ka drejtuar filma si 500 Days of Summer, The Amazing Spider-Man dhe The Amazing Spider-Man 2. Borëbardha do të dalë në kinema vitin e ardhshëm./Katror.info
Përgatiti:
