Prishtina, një qendër urbane që tret brenda vetes kulturën, modernitetin, me diversitetin e saj dhe një gastroskenë të zhvilluar, është destinacioni i ëndrrave për të rinjtë, diasporën dhe turistët e huaj. Ky qytet ka aftësinë për të plotësuar çdo kërkesë dhe për të shijuar çdo moment në një mënyrë të veçantë. Shumëllojshmëria dhe freskia e kuzhinave, bukuria e lokaliteteve dhe mikpritja e shkëlqyeshme janë thelbi i Prishtinës, duke e bërë atë një vend frymëzues për të gjithë ata që janë të gatshëm të shijojnë një jetë të plotë, të lumtur dhe të ndjeshme në mes të këtij metropoli të jashtëzakonshëm.
Kryeqyteti i Kosovës, aty ku ndodhen një seri institucionesh shtetërore e ekonomike, akademike e sociale, shquhet si një fole e rinisë kosovare ku jeta zhvillohet në ritmin e shpejtë të kohës së sotme.
Padyshim në gjithë fluksin e dinamikës së saj, rol të veçantë kanë hapësirat, lokalet që shpeshherë janë të stërmbushura me klientë, por sigurisht jo pa arsye. Me një spektër të gjerë vendesh të frekuentuara për të ngrënë, pirë kafe, dhe shijuar atmosferën e jetës gjatë ditës por edhe natës, ky kryeqytet ofron një eksperiencë të jashtëzakonshme për të gjithë vizitorët. Le të hedhim një vështrim më të përafërt në disa nga vendet më të famshme në qendrën e Prishtinës, të cilat janë shpërfaqja e energjisë së këtij qyteti që frymon me gjallëri.
Mundesh me e lexu edhe…
Për shijet e të gjithëve
Në zemër të Prishtinës, tek sheshi Zahir Pajaziti dhe Nëna Tereza, gjenden një sërë lokalesh që gëzojnë një popullaritet të madh, kjo për shkak se gjatë ditës ka një qarkullim më të dendur të banorëve që jetojnë e punojnë në atë zonë. Këto vende moderne janë destinacione të preferuara të diasporës dhe turistëve të huaj. Për të ngrënë, ju mund të gjeni kuzhina më të lehta, ushqime të shpejta me një influencë moderne. Menytë e tyre janë të pasura me zgjedhje të shijshme dhe mjafton të provoni disa nga pjatat e tyre për të gjetur shijen më të përsosur për ju.
Pas një shujte të shijshme, është koha për të shijuar një filxhan kafe apo një gotë vere të zgjedhur me kujdes. Në rrugën Rexhep Luci, ju do të gjeni lokale të veçanta të kafeve dhe winebar-ve që ofrojnë një ambient të bukur dhe relaksues. Ambiente të përsosura me detaje magjepsëse si nga shërbimi ashtu dhe për nga stafi profesional e miqësor, ku zhvillohet një atmosferë që ju fton të ndiheni mirë dhe kaloni kohën me shije e hare.
“Kafet e rakisë”
Për ata që kërkojnë shijet autentike të birrave artizanale dhe rakive me karakter, në shtegun e ngushtë të rrugës 2 korriku, zënë vend disa prej lokaleve ku vërehet qartazi kultura e pijes ndër vite. Të ashtuquajtura “kafet e rakisë” i japin qytetit një ngjyre tipike qytetarie me traditë të vjetër.
Në një prej rrugëve më të ngarkuara me trafik, atë të “dëshmorët e kombit” tek lagjja Ulpiana, po ashtu mund të gjejmë bar-resturante të cilët ofrojnë menu të lloj-llojshme, nga kuzhinat më internacionale e deri tek pijet më të servuara të çdo shujte.
Të qenët një qytet-qendër, në gjithë fluksin e jetës dinamike, e bukura e këtyre lokaleve është që në çdo cep, rrugë e lagje, banuesit dhe vizitorët do të kenë mundësinë e përzgjedhjes se ku dëshirojnë të kalojnë pak momente nga koha e tyre, në varësi nga shijet personale të secilit.
Jeta e natës
Por në fund të ditës, magjisë së jetës së natës në Prishtinë rrallë kush mund t’i rezistojë.
Prishtina shkëlqen edhe në mbrëmje, kur atmosfera e qytetit ndizet me dritat e jashtme dhe zhurmën e muzikës. Në rrugën “Fehmi Agani” dhe gjatë viteve të fundit atraksioni i rrugës B, janë pozicionuar lokalitetet më të popullarizuara për të festuar mbrëmjeve të vona, para se hapat t’i dërgojnë drejtë klubeve të natës, aty ku atmosfera e krijuar nga elita e showbizit, me një publik të pasionuar pas muzikës, vallëzimit e dëfrimit vazhdon deri në orët e para të mëngjesit.
Gjatë verës, këto vende shërbejnë si pikë takimi për të rinjtë e Prishtinës dhe për vizitorët e huaj, të cilët kërkojnë argëtim dhe ndjenjë të lirë në atmosferën e zhurmshme dhe të këndshme të mbrëmjeve.
Të gjitha i gjeni në Prishtinë
Laramania e lokaleve, përhap një ndjenjë të pakrahasueshme, duke dhënë mundësi që të përjetoni një eksperiencë të re çdo herë që hyni në një lokal të ri. Ju mund të gjeni vendet simpatike për të pirë kafen e mëngjesit poshtë pallatit, lokalet më serioze për të kaluar drekën me koleget afër objektit të punës, restorantet familjare për një darkë me një tavolinë të shtruar sipas traditës, baret e vogla në cep të lagjes dhe pabet elitare në zonat luksoze të këtij qyteti. Dekorimet moderne, interieri dhe detajet e frymëzuara që simbolizojnë gjallëri dhe modernitet ndihmojnë në krijimin e një ambienti të jashtëzakonshëm që nuk do të harrohet lehtë.
Me një sharm ku mbizoteron e bukura, në çfarëdolloj koncepti të saj, gastronomia e ka ngritur Prishtinën në dimensione të një kryeqyteti unik, për atmosferën dhe “lifestyle”-in e veçantë te saj.
Çmimet e përgjithshme janë të arsyeshme dhe variojnë në përputhje me kualitetin dhe reputacionin e lokalit, duke u dhënë mundësi të gjithëve të provojnë shijen e Prishtinës pa kufizime buxhetore.
Secila ditë, një festë më vete
Gastronomia e Prishtinës është një kullë e shijes së krijuar me pasion dhe traditë, që bën që çdo ditë të jetë një festë e vërtetë për shijen e zemrës. Një përvojë që duhet përjetuar, një vend që duhet vizituar.
N’Prishtinë, aty ku çdokush të thotë “hajde pimë kafe”. /Katror.info
Marrë nga Albinfo.
Përgatiti:
