Misteri që zgjon kureshtjen e njeriut shfaqet ndonjëherë në vende ku më së paku do ta prisnim. Për shembull, në kontinentin evropian shumë të eksploruar dhe të shkelur mirë, në veriperëndim të Polonisë, pranë qytetit të vogël Griffin. Ky mister quhet “Crooked forest”, që në përkthim do të thotë “Pylli i përdredhur”. Shumë janë përpjekur tashmë të zbulojnë se çfarë ka ndodhur saktësisht në këtë pjesë të pazakontë të natyrës polake, dhe deri më tani nuk ka asnjë shpjegim të konfirmuar përfundimisht. Pra, nëse ju e gjeni ndonjëherë veten aty, përveç ajrit të pastër të pyllit, sigurisht që do të rrethoheni edhe nga “pikapyetje” të shumta.
Crooked Forest, apo Krzywy Las në polonisht, është një emër që i referohet një zone pylli pranë Griffin ku pemët rriten në forma shumë të pazakonshme. Edhe pse përmenden rregullisht 400 prej tyre, gjithnjë e më shumë burime thonë se ky numër është shumë më i vogël dhe se ka më së shumti 100 pemë të përdredhura. Departamenti lokal i pyjeve thuhet se përmend vetëm 80 pisha. Pemët e përmendura kanë një formë shumë specifike, formën e shkronjës “J”. Kthesa, pothuajse në 90 gradë, ndodhin në një lartësi prej 10 deri në 50 centimetra nga vetë toka. Gjithashtu, të gjitha pemët janë të lakuar në të njëjtin drejtim, në drejtim të veriut, kështu që e gjithë skena duket shumë e ‘rregulluar’, shkruan Katror.info.
Të gjitha pemët janë gjithashtu të shëndetshme, domethënë shtrembërimi nuk i dëmton aspak. Autoritetet lokale theksojnë se këto pemë me gjasë janë mbjellë mes viteve 1930 dhe 1945 dhe spekulojnë se në kohën e mbjelljes kanë qenë të moshës shtatë deri në 10 vjeç. Pishat e shtrembëruara rriten në një sipërfaqe prej rreth dy hektarësh dhe disa prej tyre arrijnë një lartësi deri në 15 metra. Kthesat ndonjëherë janë ‘të larta’ deri në tre metra, pas së cilës trungu bëhet përsëri i drejtë dhe ngrihet drejt qiellit.
Mundesh me e lexu edhe…
Shpjegimet se çfarë ndodhi saktësisht me këto pemë ndryshojnë nga më të thjeshtat, të cilat, siç ndodh shpesh, konsiderohen më të mundshmet, deri te ato mjaft fantastike. Një nga teoritë shumë të njohura është ajo e tankeve naziste. Përkatësisht, Pylli i përdredhur është 30 kilometra nga Shceqin, i cili ishte nën kontrollin e nazistëve në kohën kur u mbollën pemët. Përkrahësit e kësaj teorie pretendojnë se tanket naziste janë fajtorë për lakimin e trungut të tyre. Dyshohet se ata po kalonin nëpër atë zonë dhe po kalonin mbi pemët e reja. Megjithatë, kritikët e teorisë argumentojnë se ky është një shpjegim i dobët. Në atë rast, dëmi i pemëve do të ishte shumë më i madh, besojnë ata, si dhe numri i pemëve të përkulura.
Një tjetër teori e njohur është ajo e sasive të mëdha të borës që dikur mbulonte fidanët e pishave dhe kështu i shtrembëronte ato, gjë që nuk do të ishte një dukuri kaq e pazakontë. Ka edhe spekulime për gravitetin jashtëzakonisht të fortë që dyshohet se është regjistruar në zonë, madje përmenden edhe jashtëtokësorë. Megjithatë, shumica besojnë se shpjegimi më i mundshëm është më i thjeshtë dhe se pamja e pazakontë e pyllit është në fakt rezultat i një sipërmarrjeje të dështuar biznesi.
Formimi i pemëve është një praktikë e zakonshme bujqësore, argumentojnë përkrahësit e teorisë. Pemët janë të përdredhura për të bërë mobilje, instrumente, anije dhe fidanët e pemëve janë të lehta për t’u ‘menaxhuar’ dhe manipuluar. Ideja e biznesit që çoi në këtë pyll të lakuar polak, supozohet se dështoi për shkak të luftës dhe pushtimit. Sipas kësaj teorie, megjithëse nuk u konfirmua kurrë plotësisht, pemët u mbollën midis viteve 1925 dhe 1928, me qëllim të prodhimit të mobiljeve dhe u përkulën qëllimisht kur ishin 10 vjeç. Ata që i përkulën për t’i përdorur ekonomikisht, përfundimisht i braktisën në vitin 1939, pas fillimit të Luftës së Dytë Botërore, thotë kjo teori./Katror.info
Përgatiti:
