Qëndrim Zyba është emri më i përfolur në futbollin çek në ditët e fundit, pas paraqitjes spektakolare në fundjavë.
Mesfushori kosovar zhvilloi ndeshjen më të mirë në karrierë, teksa Liberec fitoi në udhëtim te Slovacko me rezultat 4-0.
Zyba ishte protagonisti kryesor i kësaj ndeshje me një asistim, një penallti të fituar dhe dy gola të shënuar, derisa në fund u vlerësua me notën 10, një notë që rrallë herë futbollistët arrijnë ta marrin.
Pas një fillimi të vështirë ku u përcjell edhe nga lëndimet, Zyba tanimë ka gjetur formën perfekte në futbollin çek dhe po udhëheq skuadrën e tij drejt një pozite që i dërgon në garat evropiane sezonin e ardhshëm.
Mundesh me e lexu edhe…
Në një intervistë për Telegrafin, Zyba flet për formën e jashtëzakonshme, golat dhe objektivat që ka me klubin e tij Slovan Liberec.
“Rikthimi në Kombëtare më ka motivuar jashtëzakonisht shumë. Asnjëherë nuk është e lehtë të marrësh notën 10, por jam shumë i lumtur me fitoren e skuadrës, sigurisht pastaj edhe për golat dhe asistimin”, thotë Zyba për Telegrafin.
“Jam në formë shumë të mirë dhe ende më duhet të punojë më shumë për t’u përmirësuar edhe më shumë dhe të kem paraqitje edhe më të mira”, vazhdon Zyba.
24-vjeçari ka zhvilluar 18 ndeshje me Liberecin, derisa ka tre gola dhe tre asistime. Ai thotë se pret numra më të mirë deri në fund të sezonit, përkundër se luan si mesfushor shkatërrues.
“Për çdo futbollist numrat janë të rëndësishëm dhe sigurisht që pres deri në fund të kem edhe më të mirë. Gjithsesi për një mesfushor defensivë nuk është keq kur shënon gola, duke marrë parasysh edhe minutat e kufizuar që kam pasur shkaku i lëndimeve”.
Ish-anëtari i Prishtinës, Ballkanit dhe Legia Varshavë ka si objektiv me klubin që të luaj në garat evropiane sezonin e ardhshëm.
Në sezonin e rregullt në Superligën e Çekisë kanë mbetur edhe tre ndeshje, ku Zyba me Liberecin synojnë t’i fitojnë ato.
“E gjithë skuadra po luan mirë dhe më në fund jemi kombinuar pasi ka shumë lojtarë të rinj. Qëllimi është t’i marrim tre fitore në tre ndeshjet e fundit dhe të përfundojmë në top 6 ku do të kishim mundësi të luajmë në garat evropiane”.
“Shpresoj që kjo të bëhet realitet, pasi e meritojmë një pozitë që na dërgon në Evropë sezonin e ardhshëm”, deklaroi mesfushori dardan.
Heroi i ri i Liberecit së fundmi ishte i grumbulluar nga përzgjedhësi i Kosovës, Franco Foda për dy ndeshjet që Dardanët i zhvilluan ndaj Islandës.
Përkundër që nuk pati rastin të luaj, Zyba shprehet shumë i lumtur me ftesën.
“Për mua është krenari e madhe që jam pjesë e Kombëtares së Kosovës. Gjithë punën që e bëj është që të jem pjesë e Kombëtares, pasi nuk ka kënaqësi më të madhe se ta veshësh fanellën e Kosovës”.
“Kam kaluar 10 ditë të mrekullueshme në Kombëtare. Përkundër se nuk pata rastin të luaj, isha i gatshëm dhe gjithmonë do të jem për vendin tim. Sa herë më kërkohet qoftë edhe një minutë për të unë do të jam maksimumin”, tha Zyba.
Ai foli edhe për dy fitoret e Kosovës ndaj Islandës, si dhe ndeshjet e ardhshme me Dardanët.
“Kemi merituar fitore në dy ndeshje ndaj Islandës. E gjithë skuadra ka luajtur mirë dhe me plot meritë jemi në Ligën B”.
“Tani na presin ndeshje shumë të rëndësishme ku kemi një grup të vështirë me Zvicrën, Suedinë e Slloveninë, megjithatë ne do të japim më të mirën nga vetja në çdo ndeshje dhe ndaj çdo kundërshtari”, deklaroi Zyba. /Telegrafi /Katror.info
Përgatiti:
