Adis Selimi, një emër premtues në politikën gjermane, është kandidat për deputet në njësinë zgjedhore 106 (Düsseldorf II) nën siglën e Partisë Socialdemokrate të Gjermanisë (SPD). I lindur në vitin 1994 në Unterbilk, Düsseldorf, Selimi vjen nga një familje me prejardhje të përzier, babai e ka nga Mitrovica dhe nënën nga Bosnja dhe Hercegovina.
Selimin e prezentoi ambasadori i Kosovës në Gjermani, Faruk Ajeti, i cili e vlerësoi lart kontributin e tij në politikën gjermane.
“Adisi ka ndërtuar një karrierë të bujshme akademike si bashkëpunëtor shkencor në Departamentin e Filozofisë të Universitetit Heinrich-Heine-Universität Düsseldorf. Në këtë universitet, ai ka përfunduar doktoratën e tij dhe vazhdon të ligjërojë, duke u bërë jo vetëm një nga ligjëruesit më të rinj në moshë, por edhe të kontribuojë me punime shkencore. Një bisedë me të është si një udhëtim intelektual mes filozofisë, politikës dhe vizionit të tij për rolin e Gjermanisë në Evropë dhe në botë.
Mundesh me e lexu edhe…
Rruga dhe arritjet e Adisit mishërojnë historinë e shumë të rinjve tanë në diasporë – njerëz që, me përkushtim dhe punë të palodhshme, shndërrohen në shembuj të jashtëzakonshëm të suksesit dhe frymëzim për brezat e ardhshëm”, shkroi Ajeti në Facebook.
Selimi është pjesë e një vale të re suksesi të të rinjve me prejardhje nga diaspora shqiptare në Gjermani. Një shembull i tillë është Arianit Besiri, me origjinë nga Mitrovica, i cili në nëntor të vitit 2024 u zgjodh kryetari i parë i një komune në Gjermani me origjinë nga Kosova.
Nëse Selimi fiton zgjedhjet federale të Bundestagut më 23 shkurt 2025, ai pritet të sjellë një perspektivë të re në skenën politike gjermane dhe të shënojë një tjetër moment të rëndësishëm për përfshirjen e mërgatës shqiptare në politikën evropiane. Kandidatura e tij përfaqëson një hap tjetër drejt integrimit dhe afirmimit të diasporës në jetën publike dhe politike të Gjermanisë./Katror.info
Përgatiti:
