Behare Zeqiri është një prej mijëra nënave, fëmijët e të cilave të lindur para kohe, u shpëtuan si rezultat i mjekimit me pajisjet e dhuruara nga organizata Action for Mothers and Children (AMC).
“Djemtë e mi kanë ardhur në jetë shumë herët, në javën e 28-të të shtatzanisë, në vitin 2006. Falë Zotit dhe falë AMC-së, sot ata gëzojnë shëndet të mirë. Ka qenë një kohë e vështirë për mua si nanë dhe për familjen. Sot ata janë me shëndet të plotë. Sot, Orgesi dhe Orgeti janë 19 vjeç, kanë përfunduar shkollën e mesme dhe kanë aplikuar për t’u bërë pjesë e Policisë së Kosovës. Jemi shumë krenarë për ta dhe për rrugëtimin e tyre” – u shpreh ajo.
Beharja ishte njëra nga folëset e edicionit të nëntë filantropik “Let’s Dance” të organizuar nga AMC, me ç’rast ndau historinë e binjakëve të saj, të cilët ishin ndër foshnjat e para të lindura para kohe në Kosovë, që u trajtuan me aparatet e frymëmarrjes me presion pozitiv të vazhdueshëm (CPAP), të dhuruara nga AMC, – shkruan Katror.info.
Mundesh me e lexu edhe...
Këtë vit, “Let’s Dance”, një nga ngjarjet më të mëdha vjetore të AMC-së, mblodhi qindra mbështetës për të ngritur fonde për shpëtimin e jetës dhe përmirësimin e shëndetit të foshnjave, nënave dhe fëmijëve në Kosovë.
“Prej një ideje të thjeshtë hajde bojmë mirë edhe shijojmë një natë të vallëzimit, sot jemi në edicionin e nëntë, po është edhe më shumë se nëntë vite kontribut. Kur shumë njerëz i janë bashku këtij misioni dhe shumë njerëz nuk kanë nejt anash, por kanë ardhë dhe kanë thënë: A e din çka, hajde të kontribuojmë, të bëjmë mirë edhe mos të mendojmë veç për veten, po të mendojmë për diçka më të madhe. Kështu që super kënaqësi po e kujtoj edhe edicionin e parë kur i kam falënderu kompanitë, njerëz që kanë besu veç në ide të shkrume, sot nuk është ma veç një ide e shkrume. Let’s Dance është histori” – tha Rina Aqifi, themeluese e “Let’s Dance”.
Sipas drejtoreshës Rina Demiri Spahija, fondet e mbledhura këtë vit do të shkojnë në të mirë të shëndetit të nënave e fëmijëve, ndërsa tregon se gjatë tërë vitit aktivitetet për përmirëmin e shëndetit nuk janë ndalur.
“Nuk është e lehtë me organizu një event tradicional, sepse pritshmëritë e njerëzve nga viti në vit rriten, mirëpo me këtë Let’s Dance të edicionit të nëntë, po më duket që kemi prezantu së pari rezultate shumë të rëndësishme të AMC-së, e po ashtu kemi mbledhur më së shumti fonde prej nëntë edicioneve” – u shpreh drejtoresha.
“Kanë vazhdu vizitat shtëpiake, ka vazhdu me u bo paptesti në gjashtë komunat e Kosovës në nivel parësor shëndetësor. Për këtë vit kemi dhënë një donacion shumë të rëndësishëm, i cili është mundësu pikërisht prej fondeve të vitit të kalum të mbledhura nga Let’s Dance, kemi dhuru dhjetë pompa të insulinës për fëmijët me diabet të tipit një dhe kjo për herë të parë në Kosovë, dhe pastaj ne do të vazhdojmë të avokojmë që këto pajisje të futen në listën e pajisjeve esenciale mjekësore” – shtoi tutje.
Në edicionin e Let’s Dance që solli artistë si Florent Abrashi e DJ Adrian Berisha, i pranishëm ishte edhe mbështetësi i palëkundur i AMC-së, Michael Gold. Ai përmes kompanisë Crimson Capital, ka qenë një forcë lëvizëse prapa suksesit të “Let’s Dance.
“Jam shumë i lumtur që sponsorizoj Action for Mothers and Children, sepse rezultatet janë thjesht të jashtëzakonshme. Ka ulur vdekshmërinë e foshnjave, ka përmirësuar shëndetin e nënave dhe fëmijëve, dhe ata vazhdojnë të bëjnë gjithnjë e më shumë gjëra, kështu që për mua është vërtet një nder të mund t’i mbështes.”
E sic theksohet nga AMC, jetët e më shumë se gjashtë mijë foshnjave në Kosovë u shpëtuan si rezultat i mjekimit Surfaktant dhe përdorimit të CPAP, mbi 20 mijë gra dhe çifte të reja kanë përfituar nga klasat për nëna në 18 Qendra të Mjekësise Familjare, mbi 20 mijë gra kane perfituar pap teste falas në gjashtë komuna të ndryshme, ndërsa janë dhuruar medikamente në vlerë prej 3 milionë euro.
Të gjitha këto nuk do të mund të ishin arritur pa miqtë, donatorët e fugurat e njohura publike, që as këtë vit nuk u kursyen duke iua bashkuar eventit Let’s Dance, përmes të cilit ngriten fondet.
“Kam qenë edhe më herët. Është një kauzë shumë e mirë. Kauza qysh e di ka fillu domethënë prej nënës që i ka pas dy fëmijë binjakë, unë jam nënë që kam vetë binjakë dhe instinktivisht domethënë kam shprehur dëshirë që me kanë pjesë e kësaj kauze” – u shpreh një e ftuar.
“Sonte ka qenë një festë shumë e mirë, më e ëmbël, më e shyhretshme që thojnë. “Bashkëshortja punon në mjekësi familjare me fëmijë, në bazë të saj edhe unë i ndjej ato ndjenjat për fëmijë” – theksoi edhe një i ftuar tjetër.
Ky edicion i “Let’s Dance” vendosi rekord duke mbledhur mbi 40,000 € në mbështetje të programeve të AMC-së. E më e bukura është se një ide në letër e para 9 vjetëve, u konkretizua dhe po vazhdon me misionin për të shpëtuar jetë./Katror.info.
Edicionin #87 të plotë e gjeni KËTU 🙂
