Po që se Kosova anëtarësohet në Zonën Unike të Pagesave në EURO (SEPA) qytetarët do të mund të bëjnë transfere parash ndërmjet bankave të Kosovës drejt atyre te Bashkimit Evropian dhe vendeve tjera që janë anëtare të SEPA-s me çmime sikur mes bankave në Kosovë.
Integrimi në SEPA pritet të sjellë përfitime të konsiderueshme ekonomike, duke përfshirë një kursim vjetor të vlerësuar rreth 55 milionë euro nga tarifat për transferet ndërkombëtare.
Në përpjekje për anëtarësim, Guvernatori i Bankës Qendrore të Republikës së Kosovës (BQK), Ahmet Ismaili dhe Zëvendësguvernatori Fusha janë takuar me Drejtorin e Përgjithshëm për Stabilitet Financiar, Shërbime Financiare dhe Tregjeve të Kapitalit në DG FISMA, John Berrigan për të diskutuar para-aplikimin e BQK-së për anëtarësim në Zonën e Unike të Pagesave në Euro (SEPA).drejtues të Bankës Qendrore të Kosovës kanë realizuar një takim me Drejtorin e Përgjithshëm për Stabilitet Financiar, Shërbime Financiare dhe Tregjeve të Kapitalit në DG FISMA, John Berrigan, gjatë së cilit është diskutuar para-aplikimi i institucionit për anëtarësim në SEPA, që u dorëzua më 14 tetor.
Mundesh me e lexu edhe…
Në komunikatën për media të BQK-së thuhet se gjatë takimit u konfirmua Para-aplikimi për anëtarësimin e Kosovës në SEPA dhe u përcaktuan hapat e mëtejshëm.
Diskutimet u përqendruan në reformat dhe përparimin e BQK-së në harmonizimin e legjislacionit me standardet e Bashkimit Evropian, përfshirë përgatitjen e ndryshimeve ligjore të nevojshme që mundësuan para-aplikimin për anëtarësim në SEPA.
“Takimi theksoi nevojën për miratimin përfundimtar të dy ligjeve kryesore – Ligjin për Bankat dhe Ligjin për Shërbimet e Pagesave – që do t’i lejojnë DG FISMA të ofrojë një vlerësim të plotë, me komentet dhe rekomandimet përkatëse gjatë kësaj faze fillestare. DG FISMA rikonfirmoi zotimin e saj për të trajtuar në mënyrë efikase Para-aplikimin, duke pritur pranimin e legjislacionit të miratuar përfundimisht për të ofruar udhëzime të mëtejshme mbi hapat pasues që duhen ndjekur drejt anëtarësimit përfundimtar në SEPA”, thuhet në komunikatën e BQK-së.
Pas përfundimit të kësaj faze, procesi do të vazhdojë në Këshillin Evropian të Pagesave (EPC), ku një vendim përfundimtar për anëtarësimin e Kosovës në SEPA mund të pritet vitin e ardhshëm si pjesë e iniciativës më të gjerë të integrimit të Ballkanit Perëndimor.
Falë Zonës Unike të Pagesave në Euro (SEPA), klientët mund të bëjnë pagesa në euro pa para – nëpërmjet transferimit të kredisë dhe debitimit direkt – kudo në Bashkimin Evropian, si dhe një numër vendesh jo anëtare të BE-së, në mënyrë të shpejtë, të sigurt dhe efikase, ashtu sikurse pagesat kombëtare. SEPA u prezantua për transfertat e kredisë në vitin 2008, e ndjekur nga debitimet direkte në vitin 2009 dhe u zbatua plotësisht deri në vitin 2014 në zonën e euros (dhe deri në vitin 2016 në vendet e SEPA-s jashtë zonës së euros).
SEPA përbëhet nga 36 vende evropiane, duke përfshirë disa vende që nuk janë pjesë e zonës së euros ose Bashkimit Evropian.
Përgatiti:
