Kur Arjeta lindi 35 vjet më parë, babai i saj qau sepse deshi që fëmija i tij i dytë të ishte djalë.
Por gjatë gjithë jetës së saj, Arjeta Puca ia ka dëshmuar kujtdo që i ka thënë ‘Nuk mund t’ia dalësh se je vajzë’, se ajo mund të bëjë gjithçka.
Madje ajo filloi edhe udhëheqjen e një biznesi në një fushë që kryesisht dominohet nga meshkujt.
Mundesh me e lexu edhe...
Arjeta është themeluese dhe administratore e Timak, një kompani me bazë shqiptare e fokusuar në prodhimin dhe konvertimin e automjeteve të ndryshme, si autoambulanca, ndërtimi/automjete speciale rrugore, pajisjet e bashkisë, autostrada etj, shkruan Katror.info.
Çdo klient që viziton fabrikën e saj e ka të vështirë të besojë se ajo është themeluesja dhe truri pas Timak-ut, dhe gjithmonë kërkon figurën mashkullore pas suksesit të saj. “Njerëzit gjithmonë pyesin nëse kam një burrë, vëlla apo baba që e bën punën, por këtë e kam krijuar duke filluar nga zero vetëm, pa asnjë mbështetje.
Dua të jem shembull i mirë për vajzat e tjera: nëse e bëra unë, mund ta bëjnë edhe ato. Ato duhet të dinë se kanë potencialin për të arritur gjithçka, edhe nëse nuk kanë mbështetjen e një figure mashkullore”, tha ajo për UN Women Albania.
Dashuria dhe forca
Arjeta me origjinë nga një qytet në veri të Shqipërisë, jetonte prej 25 vitesh jashtë vendit me familjen e saj. Ajo është diplomuar për inxhinieri kompjuterike dhe ka filluar të punojë në biznesin familjar në Turqi që në moshën 19-vjeçare. “Pas shkollës shkoja gjithmonë të punoja në biznesin e vogël familjar. Për shumë vite nuk shkova as në pushime verore, por përkundrazi udhëtova për punë në vende të ndryshme nga Kina në Kroaci. Doja të rritesha profesionalisht”, kujton Arjeta.
Plot përvojë dhe besim Arjeta Puca u rikthye në Shqipëri pesë vite më parë dhe nuk u largua kurrë. Me dashurinë për vendin e saj, ajo vendosi të hedhë rrënjët e kompanisë së saj. “Në fillim gjithçka ishte e rrezikshme dhe e frikshme, kam hasur shumë sfida dhe pengesa, veçanërisht gjatë pandemisë COVID-19, kur përjetova vitin më të keq të jetës sime”, thotë Arjeta. “Nuk e pranova dështimin. Isha e vendosur për të pasur sukses kur të gjithë mendonin se po falimentoja”.
Tani kompania e saj është ndër kompanitë kryesore të makinerive dhe superstrukturave në vend, duke punësuar nga 8 deri në 25 punonjës, në varësi të projektit, dhe ofrojnë shërbime dhe pajisje në mbarë botën, nga Ukraina në Kili e më gjerë.
Qëllimet ambicioze
Qasja e Arjetës është të kontribuojë në zhvillimin e vendit të saj dhe të mbështesë gratë në industritë e dominuara nga meshkujt.
“Nuk doja vetëm një kompani fitimprurëse, ndaj operoj mbi dy parime kryesore: të kontribuoj në zhvillimin e vendit tim dhe të krijoj mundësi për gratë dhe vajzat që të punojnë në mjedise që zakonisht dominohen nga burrat. Dua të ndryshoj mendimin se vetëm burrat mund të punojnë me makina, makineri ose industri të ngjashme. Edhe femrat munden, është vetëm çështje dijeje dhe eksperience”, thekson Arjeta.
Kjo është arsyeja pse Timak, i kontaktuar nga UN Women, ishte shumë i etur për të nënshkruar Parimet e Fuqizimit të Grave duke u angazhuar për të fuqizuar gratë në vendin e punës dhe në komunitet.
Objektivi i saj afatgjatë është të hapë kompani të tjera në profile që ende drejtohen ose dominohen nga burrat dhe punësojnë kryesisht gra dhe vajza. “Dua që njerëzit të dinë se të punosh në prodhim nuk është punë mashkullore, të punosh në ndërtim nuk është punë mashkullore, të punosh në inxhinieri nuk është punë e buririt etj. Dhe dua që vajzat të dinë se mund të fokusohen në më shumë se disa fusha të punës, kanë mundësi të pafundme pune.”
Deri më tani, 22 kompani në Shqipëri kanë nënshkruar Parimet, të cilat janë një mjet kryesor për kompanitë për të përmbushur dimensionet e barazisë gjinore të Agjendës 2030 dhe Objektivave të Zhvillimit të Qëndrueshëm (SDGs)./Katror.info
Përgatiti:
