Për herë të parë në 35 vjet, asnjë këngë rap nuk gjendet në mesin e 40 këngëve më të dëgjuara në Shtetet e Bashkuara. Sipas njoftimit të bërë më 29 tetor nga Billboard, kënga “Luther” e Kendrick Lamar me SZA është hequr nga lista e Hot 100 pas një ndryshimi të rregullave që i jep fund një epoke të tërë për zhanrin e hip-hop-it.
Sipas sistemit të ri, këngët hiqen në varësi të rënies së tyre në renditje: ato që zbresin nën vendin e pestë pas 78 javësh, nën të dhjetin pas 52 javësh, nën të 25-in pas 26 javësh, dhe nën të 50-in pas 20 javësh. “Luther” e mbylli javën e fundit në vendin e 38-të, por siç nuk arriti të ngjitej mbi vendin e 25 pas 26 javësh, u fshi nga renditja sipas kritereve të reja.
Ky zhvillim vjen në një vit të jashtëzakonshëm për Lamar, i cili me albumin “GNX” theu rekorde si albumi që qëndroi më gjatë në krye të Billboard Top Rap Albums. Ai gjithashtu performoi në shfaqjen e mesit të Super Bowl 2025 dhe fitoi pesë çmime Grammy në të gjitha kategoritë ku ishte nominuar.
Mundesh me e lexu edhe…
Ndërkohë, muzika pop vazhdon të dominojë: çdo këngë nga albumi i ri i Taylor Swift, The Life of a Showgirl, renditet në listë. Justin Bieber, Olivia Dean dhe Alex Warren mbajnë pozicione të qëndrueshme, me këngën “Ordinary” të Warren që ka kaluar 37 javë në Hot 100.
Megjithëse rap-i është zhdukur nga pjesa e sipërme e tabelës, disa këngë vazhdojnë të mbajnë një prani modeste: YoungBoy Never Broke Again me “Shot Callin” në vendin e 44, Cardi B me “Safe” (ft. Kehlani) në vendin e 48, dhe BigXthaPlug me “Hell at Night” (ft. Ella Langley) në vendin e 49.
Sipas Billboard, ky është “sinjali më i fundit i rënies së dominimit të tregut nga rap-i”, një tendencë që ka nisur pas kulmit të tregut në vitin 2020. Në atë kohë, në tabelën e 24 tetorit 2020, kishte 16 këngë rap në Top 40 — numër që në vitin 2023 ishte përgjysmuar.
Herën e fundit që asnjë këngë rap nuk u gjet në Top 40 ishte në fillim të shkurtit 1990, kur hiti i Biz Markie, “Just a Friend”, kishte zbritur në vendin e 41 përpara se të ngjitej sërish në vendin e 29 javën pasuese.
Pas më shumë se tre dekadash, një kapitull i rëndësishëm i historisë së hip-hop-it në tabelat amerikane duket se është mbyllur — të paktën për tani./AP/Katror.info
