“Ka nisur si hobi dhe tani më është bërë profesion, e dikur stil jete. Kam nisur kur nuk ka pasur as trepikësh, as semaforë, as kosh me faul. Kam vazhduar në ligat e një shteti që sot as nuk ekziston, dhe në ligat e një shteti që po e themelonim vetë, pa ditur kur ajo ëndërr do të realizohej. Kam luajtur në beton, në sallat e sporteve, në palestrat e shkollave fillore, kam transmetuar Ligën e Kosovës nga sallat e ftohta me telefon statik për radio. Kam transmetuar NBA-n dhe Lojërat Olimpike” – rrëfen Blerim Vuniqi, ish-basketbollist dhe gazetar sportiv me përvojë të gjatë në Kosovë, në episodin e dytë të dokumentarit “4 Çerekët”.
Në këtë episod vijnë edhe rrëfime nga ish-lojtarët. Arben Krasniqi kujton mungesën e pajisjeve:
“Po, edhe fanela s’kemi pasë. Shkuam në magazinën e tyre dhe na dhanë fanela, peshqira, çorape – domethënë pajisje sportive,” – thotë ai, ndërsa Vuniqi shton: “Madje më kujtohet shumë mirë, edhe fanela nuk kemi pasë.”
Naim Hajrizi tregon për ndeshjet e vështira dhe atmosferën e tensionuar:
“Edhe hinim në fushë, edhe ndresat kanë qenë të plastikës në vitin 1984. Rezultatin s’po e përmendim, mirëpo një detaj ka qenë interesant dhe gjithmonë e përmendim: dueli Afrim Ismajli – Zhant Abak. Një luftë e madhe ka qenë, dhe për fat të keq ai duhej të përballej me Zhantin, i cili më vonë luajti në NBA.”
Mundesh me e lexu edhe…
Një moment i paharrueshëm mbetet finalja e Kupës në vitin 1991 mes Vëllaznimit dhe Trepçës. “Gjakova vlojke prej shikuesve, palestra plot, rreth palestrës dhe rreth fushës kishte policë dhe armatim të madh. Trepça ishte e përbërë kryesisht nga serbë, ndërsa Vëllaznimi ynë nga shqiptarë,” – kujton Hajrizi.
“4 Çerekët” është dokumentar i autorit dhe producentit Leart Hoxha, me intervista të realizuara nga Blerim Vuniqi, prodhim i Katror Media dhe mbështetur nga Ministria e Kulturës, Rinisë dhe Sportit.
Linku i Episodit 3: https://www.youtube.com/watch?v=KZZleXKv_tA
