“Bërthamë”, quhet emërtimi i ekspozitës që sot do të shpaloset në kryeqytet, e që vjen pikërisht për të shënuar Vitin e Personave me Aftësi të Kufizuar në Kosovë. Duke u nisur nga definicioni i fjalës bërthamë, atëherë kuptojmë se është fillimi i diçkaje apo pjesa kryesore e diçkaje, pas së cilës zhvillohen shtresat e tjera, me ç’rast kjo fjalë shqipe ka zënë vendin e saj edhe në emërtimin e kësaj ekspozite që për synim ka për të njoftuar publikun me punën e mrekullueshme të fëmijëve me aftësi të veçanta, nëpërmjet temave të përcaktuara.
Organizata “Zë – Qendra Logopedike për Trajtim dhe Hulumtim” ose për shkurtë “Zë”, shënon dhe përmbyll këtë vit të mbushur me aktivitete për persona me aftësi të veçanta përmes kësaj ekspozite me piktura të punuara nga fëmijët përgjatë vitit si pjesë e ‘Art Terapisë’ e cila është ofruar nga organizata “Zë”.
Nëpërmjet ekspozitës, do të shfaqen gjithsej 27 piktura që reflektojnë të brendshmen autentike të secilit fëmijë përfitues, tek shpaloset përmes vijave, formave dhe ngjyrave duke shprehur kështu lidhjen mes vet esencës së të qenurit, identitetit dhe perceptimit. Të ndara në 5 tema të ndryshme si: “Familja”, “Kafsha” (e preferuar), “Vendi” (i preferuar), “Ushqimi” (i preferuar) dhe “Fundviti”, ekspozita tregon për preferencat, dëshirat dhe jetën e fëmijëve të cilët kanë pikturuar.
Mundesh me e lexu edhe…
Hapja zyrtare e ekspozitës do mbahet në hapësirën e Lapidariumit të Muzeut të Kosovës, duke filluar nga ora 19:00 dhe do qëndrojë e hapur për tre ditë me radhë.
Në një intervistë për KultPlus, themeluesi dhe drejtori i organizatës “Zë”, Lekë Gjurgjiali ka thënë se gjithsej njëmbëdhjetë fëmijë kanë përfituar nga ky projekt, dhe se entuziazmi i tyre ka qenë në kulm.
Sipas tij, organizata “Zë” është e fokusuar që përpos ofrimit të shërbimeve direkte, të fuqizojë personat me aftësi të veçanta përmes artit dhe kulturës duke lehtësuar kështu integrimin e tyre në shoqëri, andaj gjithsesi që organizata do të jetë aktive edhe përgjatë vitit 2023 me projekte dhe aktivitete të tilla.
Përgatiti:
