Mbrëmja e së hënës në Kalanë e Prizrenit solli një nga momentet e veçanta të DokuFest-it: performancën e kuartetit ukrainas të muzikës botërore DakhaBrakha, shkruan Katror.info.
Marko Halanevych, Iryna Kovalenko, Olena Tsybulska, Nina Garenetska themeluan grupin në teatrin “Dakh” të Kievit. Kuarteti u shndërrua në një simbol të Ukrainës së re – të lirë, të guximshme dhe të pavarur. Me stilin e tyre unik të quajtur “ethno-chaos”, DakhaBrakha kombinon folklorin autentik ukrainas me ritmet dhe instrumentet globale, nga daullet te violonçeli, duke krijuar një eksperiencë muzikore që tejkalon kufijtë kulturorë.
Performanca në kuadër të DokuFest u shoqërua me art vizual të fuqishëm nga artistë dhe fotografë ukrainas, duke e shndërruar shfaqjen në një përvojë të paharrueshme emocionale dhe një thirrje për solidaritet.
Mundesh me e lexu edhe…
Të njohur për sukseset e tyre në festivalet më të mëdha botërore si Glastonbury, Sziget, Roskilde e GlobalFEST, DakhaBrakha interpretuan për publikun këngë të dashura si “Sho z-pod duba”, “Vesna” dhe “Ptakh”, një himn shpirtëror i Ukrainës moderne me vargje të poetit Serhiy Zhadan. Pjesa më emocionale e mbrëmjes ishte “Plyve Choven”, një homazh prekës për mbrojtësit e Ukrainës.
Që nga pushtimi rus në shkallë të gjerë, DakhaBrakha e ka parë artin si mision kombëtar. “Na duket sikur po i flasim botës në emër të gjithë vendit,” thotë vokalisti Marko Halanevych. “Ju falënderojmë për mbështetjen, ndajmë dhimbjen tonë dhe tregojmë një pjesë të vogël të kulturës sonë të pasur, duke sfiduar propagandën për ‘një komb’.”
Koncerti i DakhaBrakha u realizua me mbështetjen e BE-së. Ambasadori i Bashkimit Evropian në Kosovë, Airo Orav, gjatë pasdites së të hënës organizoi edhe një pritje të veçantë në kuadër të DokuFest-it, duke bashkuar partnerë dhe miq për “të festuar kulturën, krijimtarinë dhe shprehjen e lirë.”
“Kishim kënaqësinë të mbanim një pritje të BE-së, duke bashkuar partnerë dhe miq për të festuar kulturën, krijimtarinë dhe shprehjen e lirë. Më vonë sonte, mos e humbisni performancën e fuqishme të DakhaBrakha në Kalanë e Prizrenit — me mbështetjen e BE-së! Krenarë që qëndrojmë pranë artistëve që frymëzojnë dhe bashkojnë,” tha Zyra e Bashkimit Evropian në Kosovë në një postim në Facebook./Katror.info
Përgatiti:
