Një ëndërr që nisi në një dhomë të vogël me kompjuter është bërë realitet për Drin Shaqirin nga Prishtina, i njohur në botën e Counter-Strike me nofkën Makazze. Vetëm 18 vjeç, ai ka debutuar me ekipin legjendar Natus Vincere (Na’Vi), një nga emrat më të mëdhenj të skenës ndërkombëtare të eSportit, shkruan Katror.info.
Na’Vi, për adhuruesit e eSportit, është ajo që Real Madridi, Barcelona apo Manchester United janë për botën e futbollit. Dhe tash, një djalosh nga Kosova është pjesë e këtij klubi elitar, duke e bërë krenar mbarë komunitetin shqiptar të lojërave elektronike.
Makazze debutoi më 26 korrik në një ndeshje zyrtare për NAVI, duke hyrë në skenë përkrah yjeve të mëdhenj të CS2 (Counter-Strike 2). Ky moment shënon jo vetëm arritjen më të madhe individuale për një lojtar kosovar në eSport, por edhe një hap historik për përfaqësimin e Kosovës në këtë industri globale në rritje.
Mundesh me e lexu edhe…
Mbështetësit dhe komuniteti i lojtarëve shqiptarë kanë shpërthyer me entuziazëm dhe krenari në rrjete sociale, duke e vlerësuar debutimin e tij si një moment historik. Videoja ku Makazze shfaqet për herë të parë me fanellën e NAVI është shpërndarë gjerësisht, duke frymëzuar brezat e rinj të eSportistëve në rajon./Katror.info
