Prishtina u shndërrua në kryeqendrën e muzikës këtë të premte, me mijëra pjesëmarrës nga Kosova e shumë vende të tjera të botës të mbledhur në edicionin e gjashtë të Sunny Hill Festival.
Emra të njohur të skenës vendore e ndërkombëtare, sollën zhanre të ndryshme dhe ritme që ngritën atmosferën në Parkun e ri të Festivalit në Bërnicë të Poshtme, – shkruan Katror.info.
Me ngjyra të ndezura, veshje të guximshme dhe shumë stil, festivali u mbush me të rinj që reflektonin një atmosferë të gjallë, pozitive, liri dhe plot energji.
Mundesh me e lexu edhe…
Ata mezi prisnin të shihnin në skenë yllin tonë ndërkombëtar, Dua Lipën, duke performuar live në vendlindjen e saj, si këngëtarja kryesore e natës së parë të festivalit.
“Dojna me e pa Dua Lipën, është një këngëtare që na bën neve krenare”. “O veç kalle, kurgjo ma shumë, sot krejt jemi ardhë prej pune tu u ngutë veç me ardhë te Dua” – ishin disa nga komentet e shumta e të rinjve.
Dua, me performancën e turneut të saj botëror ‘RadicalOptimism’, për dy orë radhazi ishte madhështore, energjike, duke elektrizuar mijëra adhurues që këndonin çdo këngë bashkë me të.
Meqenëse në çdo shtet ku ajo bën turneun, këndon një këngë të një artisti lokal, me një shqipe të rrjedhshme, ftoi në skenë babain e saj, Dukagjin Lipën, për të kënduar bashkë këngën ikonë nga Gjurmët e Prishtinës ‘Era’ – ky ishte momenti epik i mbrëmjes që i boni bashkë Dugin, Duan dhe publikun në një!
Pasi përshendeti publikun, Dua u rikthye edhe një herë për të përmbyllur performancën me hitin e saj ‘Houdini’, me ndriqime vizuale dinamike në ekranet gjigante, e me shpërthime fishekzjarresh.
Festivali vazhdon edhe për dy netë të tjera, me këngëtarin kryesor të mbrëmjes së dytë, Shawn Mendes, si dhe me dhjetëra artistë të tjerë që pritet të ngjiten në skenën e magjishme që ne vendin tonë vjen vetëm një herë në vit e këtë e bënë të mundur Sunny Hill Festival./Katror.info.
