Festivali “Sunny Hill” edhe këtë vit do të vazhdojë bashkëpunimin me Trafikun Urban të Prishtinës, duke ofruar transport falas për ndekjësit e festivalit.
“Të gjithë ata që do të jenë pjesë e këtij edicioni që nis më 1 gusht e përfundon me 3 gusht, do të kenë mundësinë të udhëtojnë pa pagesë për në Festival”- thuhet në njoftim të lëshuar, sot më 26.07.2025.
Tutje, njoftohet se nisja do të bëhet nga Stacioni i Trenit në Prishtinë drejt parkut të Festivali Sunny Hill, me linja të dedikuar veçmas për Festival, ndërsa autobusët do të operojnë çdo ditë nga ora 14:00 deri në 05:30 të mëngjesit.
Mundesh me e lexu edhe…
Sipas njoftimit, ky bashkëpunim tashmë është shndërruar në një traditë vjetore, që ka për qëllim të lehtësojë qarkullimin, të zvogëlojë fluksin e veturave dhe të ofrojë një përvojë më të këndshme dhe më mirë të organizuar për të gjithë ndjekësit.
Po ashtu,, kjo iniciativë është parë se kontribuon edhe në uljen e ndotjes së ajrit dhe promovon shfrytëzimin e transportit publik në përditshmëri e veçanërisht gjatë eventeve të mëdha kur fluksi i të interesuar edhe jashtëzakonisht i madh.
Festivali “Sunny Hill”, i krijuar nga këngëtarja shqiptare me famë botërore, Dua Lipa, do të mbahet këtë verë në Prishtinë për tre ditë, ndërmjet 1 dhe 3 gushtit.
Festivali i themeluar në vitin 2018 nga këngëtarja me origjinë kosovare me famë botërore Dua Lipa dhe babai i saj, Dukagjini, është festivali më i madh muzikor në Kosovë, i cili synon ta vendosë Kosovën në hartë me një nga festivalet më të mëdha në Evropë.
Në vitin 2018, 2019 dhe 2022 është mbajtur në parkun e Gërmisë në kryeqytet, por për shkak të kufizimeve të kapaciteteve dhe shqetësimeve mjedisore ka pasur kërkesë që festivali të ketë vendndodhjen e tij.
Festivali në të kaluarën ka sjellë në Prishtinë yje të muzikës botërore si Miley Cyrus, Calvin Harris, Martin Garrix si dhe shumë këngëtarë vendas.
Sipas festivalit, që nga viti 2023, T.H.E Music Essentials renditet si një nga 5 festivalet më të mira për të ndjekur në Europë./Katror.info
