Me moton domethënëse “Inteligjenca rrjedh nga libri”, do të hapet më 11 qershor edicioni i 25-të i Panairit të Librit në Prishtinë, një prej ngjarjeve më të rëndësishme kulturore në vend. Panairi organizohet nga Shoqata e Botuesve të Kosovës, me përkrahjen e Ministrisë së Kulturës, Rinisë dhe Sportit, Komunës së Prishtinës dhe Pallatit të Rinisë.
Panairi do të jetë i hapur për vizitorët çdo ditë nga ora 09:00 deri në 21:00, ndërsa mbyllja zyrtare do të bëhet më 15 qershor në orën 19:00. Hyrja për të gjithë vizitorët do të jetë falas.
Rreth 100 botues nga Kosova, Shqipëria, Maqedonia e Veriut dhe Diaspora do të marrin pjesë në këtë panair me mbi 2000 tituj të rinj dhe rreth 6000 tituj të botuar gjatë viteve të fundit.
Mundesh me e lexu edhe…
Edicioni i sivjetmë do të shënojë gjithashtu disa përvjetorë të rëndësishëm letrarë e kulturorë: 100-vjetorin e lindjes së Martin Camajt, 150-vjetorin e lindjes së Faik Konicës, 200-vjetorin e lindjes së Pashko Vasës dhe 400-vjetorin e lindjes së Pjetër Bogdanit.
Programi do të përfshijë mbi 40 aktivitete të ndryshme, duke përfshirë promovime librash, diskutime letrare dhe prezencën e autorëve të njohur, duke e bërë këtë panair një pikëtakim të rëndësishëm për dashamirësit e librit.
Organizatorët presin rreth 30,000 vizitorë gjatë pesë ditëve të panairit, përfshirë studentë, nxënës, qytetarë si dhe figura të shquara të jetës akademike, politike e kulturore të vendit.
Panairi i Librit vazhdon të mbetet një nga ngjarjet më të dashura për lexuesit dhe një mundësi e veçantë për promovimin e librit shqip dhe kulturës letrare në Kosovë./Katror.info
