Emrat shqiptarë që u shpërblyen me çmime në diasporë gjatë 2023-ës

Viti 2023 pa dyshim ishte vit suksesi për shumë shqiptarë e shqiptare anë e mbanë botës. I tillë ishte edhe për shumë fytyra të njohura në fushën kulturore, politike, sportive, letrare e teknologjike në Zvicër, Gjermani e Austri.

Disa nga fytyrat që fituan çmime e morën lavdata në fushën e tyre janë: Ylfete Fanaj, Gjon’s Tears, Franc Aleksi, Irma Kurti e të tjerë.

Ylfete Fanaj – Të shkruash për të arriturat dhe sukseset e saj të shumta, nuk del e lehtë, sepse për ta përmbledhur bagazhin e saj në letër, do të duhej t’i kushtonim një mori faqesh. Andaj ne kemi ndaluar tek data 1 korrik 2023, ku Ylfetes iu dorëzuan “çelësat” e qeverisë duke ia besuar resorin për drejtësi dhe siguri, mbase më i rëndësishmi në nivelin e kantonit të Lucernit.

Gjon’s Tears – Posa dëgjojmë këtë emër, na shkon mendja tek zëri i tij karazimatik dhe shumngjyrësh. Ai bëri jehonë me mjeshtërinë e këndimit dhe performancën e mahnitëshme që i solli shtetit të Zvicërs kohë më parë në Eurovision. Sukseset e tij nuk iu ndaluan as në vitin 2023, ku Gjon’s Tears fitoi çmimin “Artisti më i mirë zviceran” në MTV EMA Awards.

Franci Aleksi – Emër jo shumë i njohur për audiencën e gjerë, mirëpo ai në kantonin e Lozanës u shpall si notari shqiptar, fitues i Federatës Ndërkombëtare të Sporteve Ujore. Ai ka fituar edhe 5 rekorde kombëtare në not, ka marrë pjesë në gara në 25 vende të ndryshme dhe ka fituar një stazh të paguar tek FINA – Federata Ndërkombëtare e Sporteve Ujore në Lozanë, Zvicër.

Irma Kurti – Shkrimtare shumë e dashur për të gjithë shqiptarët, italianët dhe së fundmi, edhe për zviceranët. Poetes shqiptare, Irma Kurti, i është akorduar “Çmimi i Karrierës 2023” nga Universum Academy Switzerland 2023. Ajo shquhet për poezitë e saja dhe është nderuar me 60 çmime në konkurse të ndryshme letrare në Itali dhe në Zvicër.

Elodie Mehmetaj – Është vetëm 17 vjeçe dhe po shndrit në sportin e volejbollit në Zvicër. Përveç se është një volejbolliste e shkëlqyer, ajo studion edhe për Drejtësi në Zvicër. Tani ajo është një lojëtare volejbolli që ka reputacion në ekpin e parë zviceran “VBC Valtra”, falë përgatitjeve dhe punës së saj. Viti 2023 për Elodien ka qenë i suksesshëm, por edhe sfidues.

Kristela Tepelena – Është eksperte për integrimin e emigrantëve në Gjenevë. Ajo ka përfunduar bachelorin dhe masterin në Universitetin e Gjenevës, në Fakultetin e Shkencave Sociale, për Sociologji, si dhe ka diplomuar në Shkencat Politike, po në të njëjtin universitet. Kristela punon si Asistente Sociale në “Hospice General“ dhe është njohëse e gjuhëve: anglisht, frëngjisht, italisht dhe spanisht.

Donat Rrudhani – Bashkë me Young Boys në maj të vitit 2023 u shpallën kampion i Zvicrës, duke rifituar titullin e ligës zvicerane. Ai duke luajtur si mesfushor, bashkë me ekipin e tij e kthyen trofeun në Bernë, një vit pasi Cyrihu i dha fund serisë së katër titujve radhazi të Young Boys. Kujtojmë se ai ka nënshkruar kontratë katërvjeçare me klubin zviceran BSC Young Boys.

Emiljano Hoxha – Arritjeve të shqiptarëve për vitin 2023 në Zvicër pa dyshim i shtohet edhe Emiljano Hoxha, një inxhinier i suksesshëm në një ndër „top“ firmat më të mëdha në Zvicër, “Terra Vermessungen” AG. Ai punoi si inxhinier gjeodet në ndërtimin e tuneleve, ku nga ana gjeodezike ndërtoi tunelin rrugor të tretin më të madh në Gjermani (Kramertunnel), i ndodhur në Bayern./Katror.info