Premiera e filmit biografik për mbretin e muzikës pop, Michael Jackson, pritet të shfaqet në vitin 2026, dhe familja e tij dëshiron që ajo të mbahet pikërisht në “O2 Arena” të Londrës, vendin ku ai pati planifikuar të rikthehej në skenë, por që pak kohë më vonë pati vdekur.
Ikona e muzikës vdiq në muajin qershor të vitit 2009, vetëm 18 ditë para se të ngjitej në skenë për herë të parë në serinë e koncerteve “This Is It”. Tani, familja e tij dëshiron që filmi biografik “Michael” të ketë premierën në po atë vend.
“Ishte ëndrra e Michaelit të mbante atë koncert në ‘O2 Arena’ dhe tani familja e tij shpreson që kjo të përmbushet pjesërisht me premierën e filmit në atë vend”, ka thënë një burim për gazetën The Sun.
Mundesh me e lexu edhe…
Filmi pritet të dalë në muajin prill të vitit 2026, por ende nuk është konfirmuar zyrtarisht vendi i premierës.
Ndërkohë, vajza e këngëtarit, Paris Jackson, ka mohuar çdo përfshirje në projekt. Ajo reagoi në rrjete sociale pasi aktori Colman Domingo, i cili luan rolin e Joe Jackson, babait të Michaelit, kishte deklaruar për revistën People se fëmijët e yllit “janë shumë mbështetës ndaj filmit tonë”.
“Kam biseduar shkurtimisht me Paris gjatë një ngjarje bamirësie të amfAR në Paris. Jam i emocionuar të jem këtu sonte me të. Duket si një mënyrë e bukur për të qenë bashkë”, ka thënë aktori.
Ai ka shtuar se është frymëzuar thellësisht nga “familja e jashtëzakonshme e Jacksonëve”.
Por Paris reagoi menjëherë, duke hedhur poshtë pretendimet e tij.
“Mos u thoni njerëzve që unë kam qenë ‘e dobishme’ në xhirimet e një filmi ku s’kam pasur asnjë përfshirje. Kjo është shumë e çuditshme. Kam lexuar një nga versionet e para të skenarit dhe kam dhënë vërejtjet e mia për pjesët që ishin të pasakta dhe nuk më dukeshin të sinqerta, dhe kur ata nuk i morën parasysh, unë vazhdova me jetën time. Jo majmunët e mi, jo cirku im. Zoti ju bekoftë dhe suksese”, ka shkruar ajo në një postim në Instagram. /Koha/Katror.info
