Festa e 1 Qershorit në shkollën me 3400 nxënës

Është prej shkollave me mobilizim të jashtëzakonshëm. Vlerësohet të jetë ndër shkollat me numrin e nxënësve, jo vetëm në Kosovë por edhe në Ballkan. Me kapacitete që rrallë prej institucioneve arsimore vendore i kanë, ata kanë arritur që çdo cep ta shfrytëzojnë për të kremtuar 1 Qershorin – Ditën e Fëmijëve.

Nxënësja e klasës së 7-të në shkollën fillore “Mihal Grameno” në Fushë Kosovë, Lorena Nikaj ka provuar për herë të parë lojëra të ndryshme sportive. Spike ball, frisbee, “kap bishtin e deles”, “tik tak tu” ishin disa nga to. Por, Nikaj përtej sportit, ka dëshira ‘teknologjike’ për 1 qershor.

 “Në Kosovë nëpër shkolla na mungojnë pajisjet, për shembull kabinetet e teknologjisë, nuk jemi të pajisur me llaptopa ose kompjutera të shkollës nëse duam diçka në teknologji apo në informatikë, nuk mund ta bëjmë”, tha për Katror Nikaj.

Ana tjetër e shkollës ishte rezervuar për këngë, valle, dans bashkëkohor e motive tradicionale. Disponimi në këtë pjesë ishte në nivel, teksa të gjithë shijonin këngët më trendy të kohës.

Por nuk mungoi as kënga e përzemërt e fëmijëve, “Macja le të lahet”.

“Më ka pëlqyer gjithçka që kemi pasur ne në vallëzimin tonë. Por kur sillem më shumë më pëlqen”, tha nxënësi i klasës së tretë, Andi Rushiti.

Drejtori i shkollës thekson se sytë kah arsimi duhet të kthehen çdo ditë dhe jo veç në data të caktuara.

“Një popull i cili e ka një rini të shëndoshë, e ka edhe të edukuar mire,por mbi të gjitha të arsimuar edhe më mirë, atëherë ai popull do ta ketë të ardhmen e ndritur”, shprehet Ismet Gashi.

Tutje ai thotë se ky është mesazhi që duhet të çmohet dhe t’iu përkushtohemi.

“Jo vetëm deklarata se këtë vit apo të ardhshmin e kemi synim si Qeveri, shtet, Ministri vlerat e arsimit por këto duhet të jenë në kontinuitet të përhershëm”, përfundon ai.

Shkolla “Mihal Grameno” në dy objekte ka 3400 nxënës dhe 120 mësimdhënës./Katror.info