Edicioni i 17-të i Panairit të Librit në Prizren ka filluar, duke mbledhur shtëpi botuese, autorë dhe lexues në një ngjarje kulturore që tashmë është bërë pjesë e identitetit letrar të qytetit. Ngjarja po organizohet nga Instituti për Kulturë dhe Kërkime Sociale (IKKS), dhe zhvillohet në sheshin historik të Lidhjes së Prizrenit.
Në këtë edicion marrin pjesë 25 shtëpi botuese nga Kosova dhe rajoni, të cilat po prezantojnë tituj në gjuhën shqipe, por edhe në gjuhë të tjera si turqishtja, anglishtja dhe boshnjakishtja. Panairi do të qëndrojë i hapur për pesë ditë, duke ofruar një larmi të gjerë librash për çdo brez dhe shije leximi.
Aktivitetet në kuadër të panairit përfshijnë edhe takime me autorë të njohur, që do të mbajnë ligjërata dhe diskutime të hapura me publikun çdo mbrëmje. Qëllimi i organizimit është të nxitet leximi dhe të promovohet letërsia vendore dhe ajo e rajonit përmes dialogut të drejtpërdrejtë mes autorëve dhe lexuesve./Katror.info
