Fluturimet e gjata mund të kenë shumë ndikime në trupin tonë – më shumë sesa thjesht ndjenja e lodhjes nga ndryshimi i orës. Nëse keni udhëtuar për më shumë se 10 orë, ndoshta e mbani mend mirë atë ndjesi të pakëndshme të qëndrimit të gjatë në ulëse të ngushta.
Ndërsa hapësira mes ulëseve është zvogëluar që nga vitet 1990, kohëzgjatja e fluturimeve po zgjatet. Linja ajrore Qantas pritet të nisë fluturimin Sydney–Londër në fund të vitit 2025, që do të zgjasë plot 20 orë, duke u bërë më i gjati në botë. Aktualisht, rekordin e mban Singapore Airlines me linjën New York–Singapore, që zgjat mbi 18 orë.
Por sikleti i udhëtimeve të tilla nuk vjen vetëm nga mungesa e hapësirës. Ajri i thatë në kabinë, ndryshimet e presionit dhe mungesa e lëvizjes ndikojnë në shëndetin tonë. Në raste të rralla, mund të zhvillohen edhe mpiksje gjaku që, nëse arrijnë në mushkëri, shkaktojnë emboli pulmonare – një gjendje potencialisht fatale.
Mundesh me e lexu edhe…
Megjithatë, mjekët theksojnë se shumica e njerëzve nuk kanë pse të shqetësohen.
“Në përgjithësi, fluturimi është i sigurt për të gjithë. Problemet lindin vetëm kur ka gjendje shëndetësore paraprake”, thotë mjeku Michael J. Manyak, ekspert në mjekësinë ekspeditore.
Rreth 50% e ajrit në kabinë merret nga jashtë avionit, në lartësi ku ajri është shumë i thatë. Kjo shkakton tharje të syve, fytit dhe hundës.
“Zonat mukozale thahen, dhe trupi humbet lubrifikimin natyral”, shpjegon Manyak.
Zgjidhja? Pini shumë ujë para dhe gjatë fluturimit. Kjo përmirëson qarkullimin dhe mban hidratimin.
Ajri i thatë mund të përkeqësojë gjendje si astma, ndërsa ndryshimet e presionit gjatë ngritjes dhe uljes mund të shkaktojnë dhimbje në veshë dhe sinuse.
Nëse ndiheni sikur “kapni çdo herë një të ftohtë” pas fluturimeve, Manyak sqaroi se zakonisht infeksionet ndodhin në aeroporte, jo në kabinë. Ajri në avion filtrohet 20–30 herë në orë me filtra HEPA, të ngjashëm me ata në sallat e operacionit.
Qëndrimi për orë të tëra në të njëjtin pozicion i lodh muskujt. Mund të ndjeni dhimbje në qafë, shpinë ose këmbë.
Sipas Kevin Lees, drejtor në The Joint Chiropractic, qëndrimi ulur për shumë orë rrit inflamacionin dhe presionin mbi disqet mes rruazave të shtyllës kurrizore, veçanërisht në pjesën e poshtme të shpinës. /AP/Katror.info
