Bota sot shënon Ditën Ndërkombëtare Kundër Kancerit të Gjirit. Ndërsa numri i të prekurave me këtë sëmundje shënon rritje, gjithashtu po rritet edhe shpresa për një vaksinë të shpejtë, meqë kompani të ndryshme farmaceutike kanë nisur “garën” për prodhimin sa më të shpejtë të vaksinës që shkatërron qelizat kancerogjene.
Karen Lynch u diagnostikua me kancer gjiri në moshën 44-vjeçare, disa vjet pasi që shumë nga anëtaret e familjes së saj u përballen me sëmundjen. Ajo ka vendosur që t’i bashkohet një studimi novator në Penn Medicine, ku po trajtohet, për të testuar një vaksinë që potencialisht mund të parandalojë përsëritjen e kancerit të gjirit.
“Ishte vendim i lehtë për t’iu bashkuar eksperimentit kur e dija se mund të ketë një vaksinë që mund t’iu ndihmojë fëmijëve të mi, thotë Linch për britaniken Time.
Mundesh me e lexu edhe…
Vaksinat shpesh quhen mrekullia e mjekësisë moderne për aftësinë e tyre për të forcuar sistemin imunitar kundër viruseve dhe baktereve që shkaktojnë sëmundje. Meqenëse veprojnë kundër sëmundjeve infektive, pse të mos veprojnë edhe kundër sëmundjeve të tjera që kanë pllakosur prej kohësh njerëzimin, si kanceri?
- Advertisement -
“Të thuash se po punojmë për një vaksinë për të parandaluar kancerin për pjesën tjetër të jetës së njerëzve tingëllon si diçka nga Star Wars,” thotë Dr. Robert Vonderheide, drejtor i Qendrës së Kancerit Abramson në Penn Medicine. “Por nuk është një koncept që është plotësisht i pa eksploruar.”
Vaksinat për kancerin tashmë ekzistojnë. Për shembull, vaksinat e papillomavirusit njerëzor (HPV) parandalojnë në masë të madhe kancerin e qafës së mitrës.
- Advertisement -
Por shumica e llojeve të kancerit nuk shkaktohen nga viruset, kështu që ideja është që të trajnohet trupi për të njohur qelizat tumorale.
Studiuesit kanë kërkuar mënyra për ta bërë këtë, duke filluar me imunizimin e njerëzve që tashmë kanë zhvilluar kancer, në mënyrë që të reduktojnë rrezikun e përsëritjes.
Gjithnjë e më shumë, shkencëtarët po përdorin vaksina për të trajtuar kancerin më herët, dhe ata kanë filluar të shënojnë disa fitore në trajnimin e sistemit imunitar për të sulmuar kancerin e mushkërive, lëkurës dhe veshkave për të parandaluar shfaqjen e tyre përsëri në pacientët e shëruar.
Megjithatë, këto strategji nuk kanë funksionuar aq mirë me kancerin e gjirit. Vonderheide dhe të tjerët po kërkojnë të përdorin vaksinat në funksionin e tyre më të vërtetë: të optimizojnë përgjigjen imune kundër kancerit duke trajnuar qelizat për të njohur tumoret si të huaj. Pasi kjo të ndodhë në kancerin e gjirit, Vonderheide thotë se mund të jetë e mundur që jo vetëm të parandalohen përsëritjet tek njerëzit që kanë pasur tashmë kancer, si Lynch, por edhe të mbrohen njerëzit nga zhvillimi i kancerit në radhë të parë.
Një zbulim i tillë nuk mund të arrihet shpejt, thonë avokuesit e vakinsës kundër kancerit të gjirit. “Unë u diagnostikova në 1987 dhe nuk u trajtova shumë ndryshe nga ajo që ekziston sot, për sa i përket operacionit dhe kimioterapisë,” thotë Fran Visco, president i Koalicionit Kombëtar të Kancerit të Gjirit. “Po, ka shumë fokus te imunoterapia, dhe kjo është emocionuese nga një këndvështrim kërkimor.
Së fundi dy mjekët e famshëm që krijuan vaksinën anti-COVID-19 të Pfizer/BioNTech kanë thënë se një kurë për kancerin është e arritshme dhe mund të jetë e disponueshme për pacientët para vitit 2030. Profesorët gjermanë Ozlem Tureci, 55 vjeç dhe Ugur Sahin, 57 vjeç, thanë se derisa shkencëtarët hezitojnë të thonë se një kurë për kancerin është e sigurt, ata kanë pasur ‘përparime’ për të cilat do të vazhdojnë të punojnë në lidhje me këtë vaksinë.
- Advertisement -
“Ndjejmë se një kurë për kancerin, ose ndryshimin e jetës së pacientëve me kancer, është në dorën tonë“, tha Tureci.
I pyetur nga BBC, se kur vaksinat e kancerit mund të aksesohen nga shumë pacientë në mbarë botën, Profesor Sahin tha: “Ne besojmë se kjo do të ndodhë, madje edhe në një shkallë më të gjerë, para vitit 2030”.
Ata thanë se zhvillimi dhe suksesi i vaksinës Pfizer/BioNTech kundër COVID-19, ka ndihmuar në punën e tyre për të gjetur një kurë për kancerin./Katror.info
Përgatiti:
Albana Isufi Jashanica
- Advertisement -
