30 euro është gjoba e “Prishtina Parking” për të gjithë ata që parkojnë veturën në parkingjet publike e nuk paguajnë tarifën e paraparë për parkim.
Kjo është gjoba të cilën e ka vendosur Komuna e Prishtinës, e të cilën do ta shqiptojë Inspektorati komunal, në vend të bllokimit të veturave metodë që u praktikua më parë, e u konsiderua pjesërisht e paligjshme nga Gjykata Supreme, duke theksuar se “Prishtina Parking” po ushtron kompetenca që sipas ligjeve në fuqi u përkasin vetëm organeve të rendit publik dhe autoriteteve të trafikut.
Vendimi erdhi pas ankesës së Qendrës për Raste Gjyqësore Strategjike (GLPS) se “Prishtina” Parking po funksionon jashtëligjshëm. Por kjo qendër po e konsideron të kundërligjshëm edhe rikthimin e “Prishtina Parking”.
Mundesh me e lexu edhe…
Sipas GLPS, “Prishtina Parking” nuk po i zbaton vendimet gjyqësore dhe përmes një procedure të kundërligjshme po i obligon qytetarët me gjoba si shkak i mospagesës së tarifës së parkingut nën kërcënimin për përmbarim.
“Pa asnjë dyshim veprimet e ndërmarra nga ana e Komunës së Prishtinës nuk kanë asnjë bazë ligjore e për më tepër bien në kundërshtim edhe me vetë Rregulloren aktuale. Prandaj, referuar edhe Aktgjykimit të Gjykatës Supreme, CSL kërkon nga ana e qytetarëve që të kryejnë pagesat për tarifat e shfrytëzimit të parkingjeve, por rikujton se nuk kanë asnjë obligim ligjor as financiar lidhur me gjobat mandatore që po shqiptohen nga Drejtoria e Inspeksionit për mospagesë të parkingut”, thuhet në një përgjigje të GLPS-së.
U.d. i kryeshefit të “Prishtina Parking”, Amir Kozmaqi, ka thënë se ata kanë hartuar një marrëveshje me Komunën e Prishtinës në përputhje me kërkesat e Gjykatës Supreme.
“Pas pranimit të Aktgjykimit të Gjykatës Supreme, e cila ka shfuqizuar pjesërisht disa nene të Rregullores për Rregullimin e Parkingjeve në Prishtinë, është hartuar një marrëveshje ndërmjet Komunës së Prishtinës dhe ndërmarrjes publike “Prishtina Parking”. Për të siguruar funksionalitet të plotë dhe përputhje me aktgjykimin e Gjykatës kjo marrëveshje përcakton se “Prishtina Parking” mbështet inspektorët me logjistikë, mjete dhe personel teknik pa marrë kompetenca vendimmarrëse, ndërsa shqiptimi i gjobave për mospagesë i takon ekskluzivisht Inspektoratit të Komunës së Prishtinës, i cili ka kompetencë të plotë ligjore”, ka thënë ai.
Ai ka shtuar se pas rikthimit të funksionalitetit, brenda një periudhe prej një muaji e gjysmë, pagesat orëshe janë rikthyer në afërsisht 85% të nivelit të tyre të mëparshëm.
Nga Drejtoria e Inspeksionit kanë thënë se ata janë duke funksionuar në harmoni të plotë me aktvendimin e Gjykatës Supreme dhe me ligjet në fuqi.
“Ua bëjmë të qartë gjithë qytetarëve se nga data 15 shtator i këtij viti, të gjitha gjobat vendosen nga Drejtoria e Inspeksionit dhe jo nga ‘Prishtina Parking’. Kjo është bërë në harmoni të plotë me aktvendimin e Gjykatës Supreme dhe ligjet në fuqi. Pra Gjykata Supreme nuk e ka shfuqizuar gjithë rregulloren e ‘Prishtina Parking’, por vetëm disa nene, ku ‘Prishtina Parking’ nuk ka më të drejtë të shqiptojë gjoba, por këtë kompetencë mund ta ushtrojmë ne si Drejtori e Inspeksionit. Në konsultim me zyrën ligjore, Inspektorati komunal e ka krijuar tiketën duke u bazuar pra plotësisht në vendimin e Supremes dhe në ligjet në fuqi”, ka thënë inspektori komunal, Atdhe Berisha.
Sipas Inspektorit të shërbimeve publike në Drejtorinë e Inspeksionit, Atdhe Berisha, mbi 90 për qind e qytetarëve po e bëjnë pagesën, e cila nga 30 paguhet vetëm 15 në rast se pagesa bëhet brenda 2 jave nga shqiptimi i gjobës.
“Për shkak se është një volum bukur i madh, jemi disa inspektorë të angazhuar. Pothuajse 95 për qind e kanë mirëpritur sidomos banorët rezidentë që iu është lehtësuar më shumë funksionimi në lagjet e tyre nga ‘Prishtina Parking’. Gjoba është 30 euro, por në rast se pagesa bëhet brenda 15 ditëve, gjoba përgjysmohet në 15 euro”, ka thënë ai, shkruan Koha.net.
Në rast të mospagesës së tarifës së përcaktuar nga “Prishtina Parking”, tani shqiptohet vetëm gjoba dhe jo edhe marrja e veturës me merimangë siç ishte më parë./Katror.info
