Pas një periudhe intensive provash që ka nisur më 25 shkurt, shfaqja më e re me regji dhe skenar të Fatos Berishës, “God Bless America”, do të ketë premierën më 9 prill në Teatrin e Gjilanit.
I ftuar në programin e mëngjesit në RTK, regjisori Berisha foli për procesin krijues dhe përvojën e tij të re si autor teksti në teatër.
“Është hera e parë që po punoj me një tekst timin në teatër. Shfaqja paraqet një fabul metaforike për katër shitës të Biblës në Amerikën e viteve ’60. Ideja më lindi nga një film dokumentar me titull ‘Shitësit’. Tekstin e kam shkruar gjatë pandemisë, një kohë e vështirë dhe shumë e ngarkuar emocionalisht për të gjithë”, u shpreh Berisha.
Mundesh me e lexu edhe…
Ai shtoi se përpiqet të sjellë në skenë tema me peshë dhe aktualitet, ndërsa qasja në zhanër është gjithmonë e ndikuar nga vetë fabula.
“Zhanret shpesh dalin vetë nga përmbajtja. Më pëlqen t’i përziej zhanret, sikurse edhe jeta që nuk mund të futet në një kategori të vetme. Shpresoj që publiku ta shijojë këtë përvojë skenike”, tha ai.
Berisha e cilësoi këtë projekt si një sfidë të dyfishtë për shkak të rolit të tij si autor dhe regjisor, por edhe për faktin se ka ndërtuar një tekst që i nënshtrohet vazhdimisht kritikës dhe rishikimit.
“Jam përpjekur të jem i pamëshirshëm me tekstin, për ta bërë sa më të saktë dhe të fortë artistikisht. Kam inkurajuar aktorët të jenë të hapur dhe kritikë ndaj tekstit, me qëllim që të gjithë së bashku ta çojmë nivelin sa më lart”, theksoi ai.
Kasti i aktorëve përfshin: Avni Shkodra (Lepuri), Gani Rrahmani (Dhelpra), Kushtrim Qerimi (Demi) dhe Ali Demi (Arusha). Gjatë rrugëtimit të tyre, ata ndërveprojnë me një galeri personazhesh të tjera të interpretuara nga: Aurita Agushi, Alban Shahiqi, Mejreme Berisha, Tringa Hasani, Safete Mustafa, Bashkim Nexhipi, Artan Selimi dhe Florent Salihu.
“God Bless America” premton të jetë një përvojë teatrale e thellë dhe emocionale, që sfidon perceptimet dhe reflekton mbi çështje sociale, morale dhe njerëzore me një qasje të guximshme dhe të menduar artistikisht./Katror.info
Përgatiti:
