Në kohën kur çmimet e naftës në tregjet ndërkombëtare po shënojnë rritje për shkak të tensioneve mes Iranit dhe Izraelit, ministrja në detyrë e Industrisë, Ndërmarrësisë dhe Tregtisë, Rozeta Hajdari, ka deklaruar se Kosova qëndron më e mbrojtur në aspektin ligjor për sa i përket sektorit të naftës, por jo edhe për produktet tjera bazë, përcjell Katror.info.
Në një prononcim gjatë lansimit të skemës së granteve për ndërmarrjet në sektorin TIK, Hajdari tha se vendi ka kornizë ligjore për të rregulluar çmimet e derivateve, ndryshe nga produktet tjera esenciale, për të cilat mungon një ligj funksional për rregullimin e çmimeve.
“Ligji për rregullimin e çmimeve të produkteve bazë nuk arriti të miratohet për shkak të kundërshtimeve nga opozita. Gjykata Kushtetuese e ka hedhur poshtë ligjin, duke e konsideruar si kufizim të konkurrencës së lirë në treg”, deklaroi ajo.
Mundesh me e lexu edhe…
Ministrja theksoi se, ndonëse çmimet në tregun vendas nuk mund të ndikohen në mënyrë direkte, pasi varen nga importi dhe çmimi referues i Doganës së Kosovës, ekziston mbikëqyrje e shtuar për zbatimin e rregullave aktuale.
Sipas të dhënave të fundit, çmimi për një litër naftë në Kosovë varion nga 1.17 euro deri në 1.25 euro.
Hajdari konfirmoi se Inspektorati Qendror i Mbikëqyrjes së Tregut është aktiv dhe ka shtuar ndjeshëm inspektimet, veçanërisht në sektorin e naftës. E pyetur për një rast të dyshuar në Pejë, ku një pikë derivatesh pretendohet se operon jashtëligjshëm, ajo tha se nuk është në dijeni, por institucionet përkatëse janë të angazhuara për çdo rast të tillë.
Ministrja theksoi gjithashtu progresin në formalizimin e sektorit: “Kur kam nisur mandatin në vitin 2021, mbi 50 për qind e pikave të karburanteve ishin të palicencuara. Sot, mbi 98 për qind janë të licencuara, falë thjeshtimit të procedurave dhe uljes së tarifave – 50 euro për naftën dhe 55 euro për produktet e duhanit.”
Këto deklarata u dhanë në një ngjarje ku u prezantua skema e granteve prej 1 milion euro për ndërmarrjet mikro, të vogla dhe të mesme në sektorin e teknologjisë së informacionit dhe komunikimit./Katror.info
