Gazetarët dhe gazetaret nga Ballkani Perëndimor dhe Turqia tashmë mund të aplikojnë për Çmimin e Bashkimit Evropian për Gazetari Hulumtuese 2025, shkruan Katror.info.
Thirrja është e hapur deri më 16 qershor 2025, në mesnatë, dhe synon të vlerësojë punimet më të mira hulumtuese që kontribuojnë në mbrojtjen e lirisë së shprehjes, forcimin e sundimit të ligjit dhe rritjen e transparencës në shoqëri.
Ky çmim, i organizuar nga Thomson Media në bashkëpunim me partnerë lokalë në rajon, përfshin një konkurs kombëtar në secilin nga vendet pjesëmarrëse, si dhe një çmim rajonal ku konkurrojnë fituesit e garave kombëtare dhe punimet e nominuara posaçërisht. Fondi total shpërblyes përfshin një shumë prej 10.000 euro për çdo nivel, kombëtar dhe rajonal, me ndarje për vendin e parë, të dytë dhe të tretë.
Mundesh me e lexu edhe…
Për të marrë pjesë në konkurs, kandidatët duhet të dorëzojnë punimet e tyre brenda afatit të përcaktuar përmes platformës zyrtare, ku mund të gjendet edhe dokumentacioni i plotë i nevojshëm për aplikim. Thirrja është e hapur për të gjithë ata që, përmes gazetarisë hulumtuese, kanë kontribuar në adresimin e çështjeve me interes publik dhe kanë ofruar informacione me ndikim shoqëror.
Organizatorët kanë bërë thirrje për përhapjen e këtij informacioni përmes faqeve të internetit, rrjeteve sociale dhe buletineve mediatike, në mënyrë që thirrja të arrijë tek sa më shumë profesionistë të fushës dhe të sigurohet një përfaqësim sa më i gjerë në këtë garë prestigjioze. Për më shumë informacione dhe udhëzime rreth aplikimit, të interesuarit mund të vizitojnë faqen zyrtare të çmimit: https://euwbmedia.com.
Organizatori i çmimit është, përsëri, Thomson Media, një organizatë me dekada përvojë në zhvillimin
e mediave dhe promovimin e lirisë së medias në nivel global.
/Katror.info
