Departamenti Amerikan i Sigurisë Kombëtare (DHS) ka thënë se Universiteti i Harvardit mund të humbasë mundësinë e tij për të regjistruar studentë të huaj nëse nuk i plotëson kërkesat nga administrata Trump për të ndarë informacione për disa mbajtës të vizave, duke shënuar kështu përshkallëzimin e qeverisë kundër institucionit arsimor.
Sekretarja e Departamentit të Sigurisë Kombëtare, Kristi Noem, ka njoftuar gjithashtu të mërkurën përfundimin e dy granteve të DHS në vlerë prej më shumë se 2.7 milionë dollarësh për Harvardin, raporton Reuters.
Noem ka thënë se i ka shkruar një letër Harvardit duke kërkuar të dhëna mbi ato që ajo i ka quajtur “veprimtaritë e paligjshme dhe të dhunshme” të mbajtësve të vizave studentore të huaja të Harvardit, deri më 30 prill.
Mundesh me e lexu edhe…
“Dhe nëse Harvardi nuk mund të verifikojë se është në përputhje të plotë me kërkesat e raportimit, universiteti do të humbasë privilegjin e regjistrimit të studentëve të huaj”, ka thënë Noem në një deklaratë.
Një zëdhënës i Harvardit ka thënë se universiteti është në dijeni të letrës së Noem “në lidhje me anulimin e granteve dhe shqyrtimin e vizave të huaja studentore”.
Zëdhënësi ka shtuar se universiteti i qëndron deklaratës së tij në fillim të javës për të “mos dorëzuar pavarësinë e tij ose të heqë dorë nga të drejtat e tij kushtetuese”.
Administrata e presidentit, Donald Trump ka kërcënuar universitetet me shkurtime të fondeve federale për protestat pro-palestineze të kampusit kundër sulmit shkatërrues ushtarak të aleatit të SHBA-së, Izraelit në Gaza
Trumpi i konsideron protestuesit si kërcënim të politikës së jashtme, të cilët janë antisemitë dhe dashamirës ndaj Hamasit.
Protestuesit, duke përfshirë disa grupe hebreje, thonë se administrata Trump gabimisht ngatërron avokimin e tyre për të drejtat palestineze dhe kritikat ndaj veprimeve të Izraelit në Gaza me mbështetjen për ekstremizmin dhe antisemitizmin
Administrata Trump po përpiqet gjithashtu të dëbojë disa protestues të huaj dhe ka hequr qindra viza në të gjithë vendin.
“Me një fond prej 53.2 miliardë dollarësh, Harvardi mund të financojë kaosin e vet, DHS-ja nuk do ta bëjë”, ka thënë Noem, duke shtuar se në Harvard ekzistonte një “ideologji anti-amerikane, pro-Hamasit”.
Harvardi ka thënë më parë se ka punuar për të luftuar antisemitizmin dhe paragjykimet e tjera në kampusin e tij, duke ruajtur liritë akademike dhe të drejtën për të protestuar./ABC News/Katror.info
Përgatiti:
