Një e mbijetuar e dhunës seksuale gjatë luftës në Kosovë ka filluar të marrë njëkohësisht dy pensione: atë si viktimë e dhunës seksuale dhe pensionin e moshës. Ky është rasti i parë ku zbatimi i kësaj të drejte ligjore po realizohet në praktikë.
“Për herë të parë, një e mbijetuar e dhunës seksuale gjatë luftës në Kosovë ka filluar të marrë të dy pensionet që i takojnë me ligj: pensionin si viktimë e dhunës seksuale dhe pensionin e moshës. Dhe sot, për herë të parë, një e mbijetuar nuk duhet të zgjedhë mes dy identiteteve të saj, ajo i mban të dyja me dinjitet”, thuhet në njoftimin e QKRMT-së.
Që nga viti 2021, Qendra Kosovare për Rehabilitimin e të Mbijetuarve të Torturës (QKRMT) ka ndjekur procedura gjyqësore për njohjen e kësaj të drejte, të cilat kanë përfunduar me vendime të formës së prerë nga Gjykata Themelore në Prishtinë dhe Gjykata e Apelit.
Sipas QKRMT-së, ky vendim vendos një precedent që mund të shërbejë për raste të tjera të ngjashme në të ardhmen.
Aktualisht, dhjetëra raste të tjera janë në shqyrtim nga gjykatat. QKRMT vijon të avokojë që kjo e drejtë të njihet automatikisht për të gjithë të mbijetuarit që kanë arritur moshën e pensionimit, pa pasur nevojë për procedura të ndara ligjore./Katror.info
Përgatiti:
