“Ka nisur si hobi dhe tani më është bërë profesion, e dikur stil jete. Kam nisur kur nuk ka pasur as trepikësh, as semaforë, as kosh me faul. Kam vazhduar në ligat e një shteti që sot as nuk ekziston, dhe në ligat e një shteti që po e themelonim vetë, pa ditur kur ajo ëndërr do të realizohej. Kam luajtur në beton, në sallat e sporteve, në palestrat e shkollave fillore, kam transmetuar Ligën e Kosovës nga sallat e ftohta me telefon statik për radio. Kam transmetuar NBA-n dhe Lojërat Olimpike” – rrëfen Blerim Vuniqi, ish-basketbollist dhe gazetar sportiv me përvojë të gjatë në Kosovë, për epizodin e dytë të dokumentarit “4 Çerekët”.
Në këtë episod, Vuniqi tregon edhe historinë interesante të kthimit nga jashtë të Ibrahim Karabegut:
“Si je kthy prej jashtë?” pyet Vuniqi.
“Jam kthy prej jashtë. Kur shkova te motra, e pashë vëllanë dhe trajnerin Bardhyl Nushin aty. Kur i pashë, u çudita shumë, dhe thashë: ‘Çfarë po lypin këta njerëz këtu?’ Ia nisëm bisedës. Tash vëllau dhe Bardhyli po thonë: ‘Babën e ke në burg, pse është në burg? Po a e di si është atje? Të kanë thirrur ushtarë, e ti s’ke qenë aty kur kanë ardhur me të marrë.’ E kështu ka qenë ajo pjesa. Unë jam kthy, dhe në momentin që u kthyra prej kufirit, ma morën pasaportën. E çfarë të ndodh? U ktheva në shtëpi. Kur arrita atje, babai flejt’ në gjumë,” rrëfen Karabegu.
Mundesh me e lexu edhe…
Ibrahim Karabegu është një figurë e njohur e basketbollit kosovar, fillimisht si lojtar i Prishtinës dhe më pas si trajner. Ai ka udhëhequr ekipe të ndryshme të Kosovës, përfshirë përfaqësuesen U-18, me të cilën fitoi medaljen e artë në Kampionatin Evropian, Divizioni C, në 2018. Karabegu u angazhua pas kthimit nga jashtë në zhvillimin e sportit, duke kontribuar në trajnimin e brezave të rinj dhe ngritjen e nivelit të basketbollit në vend. Ai ka luajtur një rol kyç në krijimin e mundësive për sportistët e rinj të arrijnë suksese ndërkombëtare.
Autor dhe producent i dokumentarit është Leart Hoxhës, me intervista të realizuara nga Blerim Vuniqi, prodhim i Katror Media dhe mbështetur nga Ministria e Kulturës, Rinisë dhe Sportit.
Episodi i dytë i dokumentarit mund të ndiqet në këtë link:
