Ilaçi kundër kancerit filloi të testohet të njerëzit: ‘Shkatërron kanceret e ngurta’

Shkencëtarët amerikanë kanë zhvilluar një ilaç në formën e një tablete që në testet paraklinike shkatërroi të gjitha kanceret e ngurta dhe i la të pandryshuara qelizat e shëndetshme, raporton agjencia gjermane e lajmeve dpa.

Shkencëtarët nga City of Hope, një nga organizatat më të mëdha të Amerikës për kërkimin dhe trajtimin e kancerit, publikuan një studim të martën, duke detajuar rezultatet e para të testimit të “pilulës kundër kancerit” AOH1996.

Ilaçi synon variantin kanceroz të antigjenit bërthamor të qelizave proliferuese (PCNA) – një proteinë që, në formën e saj të ndryshuar, është “vendimtare në replikimin e ADN-së dhe riparimin e të gjithë tumoreve që përhapen”, tha City of Hope.

Linda Malkas, profesore në Departamentin e Diagnostifikimit Molekular dhe Terapisë Eksperimentale në Qendrën Mjekësore të Kalifornisë, ka zhvilluar ilaçin për 20 vitet e fundit.

Malkas tha, “PCNA është si qendra kryesore e një terminali aeroporti që organizon hyrje të shumta avionësh.”

“Të dhënat sugjerojnë se PCNA është ndryshuar në mënyrë unike në qelizat e kancerit dhe ky fakt na lejoi të zhvillonim një ilaç që synon vetëm formën e PCNA në qelizat e kancerit.”

“Pilula jonë kundër kancerit është si një stuhi që mbyll një qendër kryesore të linjës ajrore, duke mbyllur të gjitha fluturimet hyrëse dhe dalëse vetëm në aeroplanët që mbajnë qeliza kanceri.”

Profesorja i quajti rezultatet premtuese dhe tha se kërkimet kanë treguar se AOH1996 mund të shtypë rritjen e tumorit në modelet e qelizave dhe kafshëve, dhe faza e parë e provave klinike njerëzore është duke u zhvilluar, shkruan Katror.info.

Tableta ka dëshmuar  të jetë efektive në trajtimin e qelizave me origjinë nga kanceri i gjirit, prostatës, trurit, vezoreve, qafës së mitrës, lëkurës dhe mushkërive.

Është testuar në më shumë se 70 linja qelizore kancerogjene dhe është zbuluar se në mënyrë selektive vret qelizat e kancerit, duke ndërprerë ciklin normal riprodhues të qelizave, sipas qendrës kërkimore.

PCNA më parë konsiderohej “paqasshme për ilaçet”.

Autori kryesor i studimit, Long Gu, tha se “askush nuk e kishte vënë në shënjestër PCNA me një ilaç, sepse mendohej të ishte i pamundur, por me sa duket City of Hope ishte në gjendje të zhvillonte një ilaç për një objektiv sfidues”.

Studimi është publikuar në revistën Cell Chemical Biology. /Katror.info