Një projekt që përveç do të mundësojë trajtim shëndetësor, do të shmangë kostot aktuale që sot kanë pacientët që vuajnë nga kanceri i tiroides në Kosovë, ka zënë fill në Prishtinë. Ambasada e Japonisë në Kosovë ia ka besuar Rotary Club Prishtina projektin për ndërtimin e Objektit Radiometabolik në QKUK, duke ofruar një grant prej 107 mijë eurosh.
Në ceremoninë e nënshkrimit të grantit, i ngarkuari me punë të përkohshme të Ambasadës së Japonisë në Kosovë, Keisuke Yamanaka theksoi rëndësinë e kujdesit shëndetësor dhe përsëriti përkushtimin e Japonisë për të mbështetur Kosovën në shëndetësi. Ai tha se me këtë projekt QKUK do të ketë objekt radiometabolik, që do të jetë i pari i kësaj natyre në Kosovë, nga i cili pritet të përfitojnë brenda vitit 100 pacientë.
“Këtë vit festojmë 15 vjetorin e marrëdhënieve diplomatike ndërmjet Kosovës dhe Japonisë. Dhe Japonia do të mbetet e përkushtuar për të mbështetur përpjekjet e Kosovës për të zhvilluar më tej këtë shtet të ri. Ishte kënaqësi e imja që mund të shtoja një kontribut të ri në këtë mënyrë, i cili besoj se jo vetëm do të jetë i dobishëm për njerëzit me nevoja mjekësore, por do të jetë një simbolikë e re për të forcuar më tej marrëdhëniet dhe miqësinë e shkëlqyer të dy vendeve tona,” tha Yamanaka.
Dafina Turkeshi, presidente e Rotary Club Prishtina, ka thënë se ky objekt do të ketë dobi të shumëfishta.
“Ky objekt i ri është shumë i rëndësishëm për Kosovën. Tani për tani, pacientët me kancer të tiroides kanë nevojë për një trajtim të veçantë të radiometabolik. Por për shkak se ne nuk i kemi kushtet e duhura, ata duhet të udhëtojnë në vende të tjera. Kjo sjell shumë probleme. Çdo udhëtim kushton rreth 2500 euro dhe gjithashtu krijon shumë stres për pacientët dhe familjen e tyre në këtë kohë të vështirë. Një numër i konsiderueshëm i njerëzve në Kosovë çdo vit diagnostikohen me kancer të tiroides. Imagjinoni barrën. Këta pacientë jo vetëm që luftojnë për sëmundjen e tyre, por edhe përballen me barrën e tyre financiare dhe sfidën e trajtimit nga shtëpia. Ky projekt është shumë më tepër sesa thjesht ndërtimi i një objekti. Ai do t’i japë pacientit trajtim këtu në shtëpi. Do të mbështesë familjet. Do të përmirësojë sistemin tonë të kujdesit shëndetësor. Ky projekt është i mundur falë Ambasadës së Japonisë, granti bujar i së cilës do të bëjë një ndryshim të madh.”
Osman Hajdari, Drejtor i QKUK-së mirërpriti projektin.
“Kjo marrëveshje, kjo kontratë faktikisht QKUK e kompleton edhe me një shërbim të dytë, që është terapia me jod,ku përpos kompletimit të infrastrukturës, natyrisht do të ngrisim edhe nivelin edhe cilësinë e shërbimeve shëndetësore, saktësinë e diagnozës dhe trajtimit sa më të mirë për pacientët, qytetarët, tonë, për të cilën kanë nevojë,” tha Hajdari.
Japonia ka zbatuar skemën Asistenca e Grantit për Sigurinë në Bazike Njerëzore, të quajtur GGP, në Kosovë edhe para pavarësisë së vendit. Por, shuma e dhënë pas pavarësisë e deri më sot, është mbi 3.9 milionë euro për 63 projekte të ndryshme./Katror.info
Përgatiti:
