Sot në Deçan u mbajt ceremonia e pranim-dorëzimit të grantit ndërmjet Ambasadës Japoneze në Kosovë dhe Qendrës Kryesore të Mjekësisë Familjare në Komunën e Deçanit. Vlera totale e projektit është 40,266 euro.
Ambasada e Japonisë në Kosovë e dhuroi këtë grant në mbështetje të përmirësimit të shërbimeve shëndetësore në këtë komunë.
Në ambientet e Qendrës së Mjekësisë Familjare në Deçan u prezantuan pajisjet mjekësore që janë dhuruar: një pajisjeje me ultratinguj, një karrigeje gjinekologjike dhe një autoklave.
Mundesh me e lexu edhe…
Ambasadori i Japonisë në Kosovë, Kiminori Iwama, i cili kujtoi se kjo qendër e mjekësisë familjare është ndihmuar prej Qeverisë japoneze qysh në vitin 2001 përmes Kryqit të Kuq, tha se Ambasada dhe populli japonez është i gatshëm dhe i interesuar për të ndihmuar Komunën e Deçanit.
“Kjo qendra është e rregulluar është e ndihmuar prej Qeverisë japoneze, prej Kryqit të Kuq në vitin 2001, dhe kjo është ndihma e parë që jepet Komunës së Deçanit në këtë aspekt drejtpërdrejt për qendrën dhe ambasada dhe populli japonez është i gatshëm dhe i interesuar për të ndihmuar edhe në të ardhmen Komunës së Deçanit dhe popullit të Kosovës”, tha ai, shkruan BotaSot.
Ndërsa kryetari i Deçanit, Bashkim Ramosaj falënderoi shtetin e Japonisë për ndihmën e dhënë në fushën e shëndetësisë për këtë komunë që nga mbarimi i luftës e deri sot.
“Ky objekt është falë popullit japonez, Qeverisë japoneze dhe Kryqit të Kuq që ka qenë lajm më i mirë për qytetarët në atë kohë ku ky qytet nuk ka ekzistu dhe kohë pas kohe kemi pas përkushtimin dhe përkujdesjen te ambasadës japoneze, të popullit japonez, qeverisë njëkohësisht dhe ka rezultuar me bashkëpunimin e fundit që e ka një kuptim tepër domethënës që kjo qendër të funksionojë me standardin çfarë po funksionon tash”, tha ai.
“Projekti për Përmirësimin e Qendrës Kryesore të Mjekësisë Familjare ‘Adem Ukehaxhaj’ në Komunën e Deçanit përmes Sigurimit të Pajisjeve Mjekësore” synon përmirësimin e shërbimeve mjekësore dhe dentare të ofruara nga Qendra Kryesore e Mjekësisë Familjare në Komunën e Deçanit përmes sigurimit të një pajisjeje me ultratinguj, një karrigeje gjinekologjike dhe një autoklave”, njofton Ambasada Japoneze në Kosovë./Katror.info
Përgatiti:
