Një delegacion i përbërë nga përfaqësues të Gjykatës Kushtetuese të Republikës së Kosovës ka zhvilluar një vizitë studimore në Austri, në kuadër të projektit të mbështetur nga Zyra e Këshillit të Evropës në Prishtinë, shkruan Katror.info.
Gjatë kësaj vizite, pjesëmarrësit patën takime me përfaqësues të institucioneve më të larta gjyqësore të Austrisë, përfshirë Gjykatën Kushtetuese Austriake, Gjykatën Supreme Administrative dhe Gjykatën Supreme të Drejtësisë. Qëllimi i vizitës ishte shkëmbimi i përvojave dhe praktikave më të mira në fushën e jurisprudencës, organizimit gjyqësor dhe forcimit të sundimit të ligjit.
Diskutimet u fokusuan në sfidat e përbashkëta që përballen sistemet gjyqësore, si dhe në metodat praktike për përmirësimin e qëndrueshmërisë në zbatimin e ligjit dhe mbrojtjen e të drejtave themelore të qytetarëve. Vizita u vlerësua si një hap i rëndësishëm drejt ndërtimit të një sistemi të drejtësisë më efektiv dhe të qasshëm, përmes bashkëpunimit ndërkombëtar dhe dialogut profesional.
Mundesh me e lexu edhe…
Zyra e Këshillit të Evropës në Prishtinë vlerësoi vizitën si një moment kyç në forcimin e kapaciteteve institucionale dhe promovimin e standardeve evropiane në sistemin kushtetues dhe gjyqësor të Kosovës./Katror.info
