Pas më shumë se 15 vitesh kërkime shkencore, Bashkimi Evropian ka dhënë miratimin për pretendimin se konsumimi i kivit ndihmon funksionimin normal të zorrëve duke rritur shpeshtësinë e jashtëqitjes. Ky vendim e bën kivi frutin e parë të freskët që merr një certifikim zyrtar për përfitimet shëndetësore në tregun e përbashkët.
Aplikimi u bë nga kompania Zespri International Limited, lider global në tregtimin e kivit, e cila zotëron një të tretën e tregut botëror. Studimet e saj shumëvjeçare treguan se konsumimi i dy kivive në ditë – rreth 200 gram– ndihmon në ruajtjen e një ritmi të rregullt tretës, shkruan Euronews.
Autoriteti Evropian për Sigurinë Ushqimore (EFSA), në opinionin e vitit 2021, pranoi ekzistencën e një lidhjeje shkak-pasojë mes konsumit të kivit dhe përmirësimit të funksionit të zorrëve.
Mundesh me e lexu edhe…
Marrja e një miratimi të tillë nga Brukseli është jashtëzakonisht e vështirë. Vetëm tre pretendime shëndetësore janë aprovuar në pesë vitet e fundit, ndërsa më pak se 12 përqind e aplikimeve kalojnë filtrin shkencor të EFSA-s.
Rregullat janë të rrepta për të mbrojtur konsumatorët nga premtimet mashtruese. Pretendimet duhet të mbështeten me prova të qarta, të kuptueshme dhe të pakontestueshme. Për shembull, disa nga pohimet e njohura që tashmë gjenden në treg përfshijnë: “kalciumi është i nevojshëm për rritjen normale të kockave tek fëmijët” ose “vitamina C ndihmon në funksionimin normal të sistemit imunitar”.
Ndërkohë që kivi ka marrë dritën jeshile, shumë produkte të tjera kanë mbetur jashtë. Probiotikët, për shembull, ende nuk kanë marrë miratimin e BE-së, pasi sipas EFSA-s, provat shkencore nuk janë të mjaftueshme. Për këtë arsye, prodhuesit e kosit në BE lejohen të përdorin vetëm formulimin “kultura të gjalla” dhe jo “probiotikë”.
Edhe botanikalet – si çajrat bimorë apo ekstraktet – ndodhen në një limbo rregullatore që prej vitit 2010, kur u pezullua vlerësimi i tyre. Vetëm disa pretendime të dorëzuara para vitit 2008 lejohen ende të përdoren në kushte të caktuara./Katror.info
