Përfaqësuesja A e Kosovës ka vazhduar sot me seancën e radhës stërvitore në Kampin Nacional në Hajvali, në kuadër të përgatitjeve për dy ndeshjet miqësore që do të zhvillohen në fillim të muajit qershor, ndaj Armenisë më 6 qershor dhe Komoreve më 9 qershor.
Në seancën e sotme kanë munguar mbrojtësi Ismajl Beka dhe portieri Amir Saipi. Beka ka pësuar një lëndim të lehtë gjatë stërvitjes së parë dhe, me rekomandim të stafit mjekësor, është stërvitur individualisht. Ndërkohë, mungesa e Saipit është për shkak të arsyeve shëndetësore.
Përzgjedhësi Franco Foda, së bashku me stafin teknik, ka zhvilluar një seancë dinamike duke u fokusuar në aspektet taktike dhe filozofinë e lojës që synohet të aplikohet në dy ndeshjet në vijim.
Mundesh me e lexu edhe…
Gjatë ditës, Kombëtarja është vizituar edhe nga presidenti i Federatës së Futbollit të Kosovës, Agim Ademi, i cili ka përshëndetur lojtarët dhe stafin teknik, duke u dëshiruar mirëseardhje futbollistëve të rinj dhe duke i inkurajuar të gjithë të japin më të mirën në paraqitjet e ardhshme.
Mesfushorët Bledian Krasniqi dhe Florian Haxha, që janë për herë të parë pjesë e Kombëtares A, janë shprehur të lumtur për ftesën dhe të motivuar për sfidat që i presin.
“Jam shumë i kënaqur me pritjen në ekip dhe krenar që jam përzgjedhur për të përfaqësuar Kosovën. Stërvitja ishte shumë pozitive dhe besoj se do të kemi paraqitje të mira në dy ndeshjet e ardhshme,” u shpreh Bledian Krasniqi. Ndërsa Florian Haxha tha se është shumë i lumtur për këtë mundësi.
“Seanca e sotme ishte intensive dhe besoj se nga nesër do të fokusohemi në mënyrë specifike për ndeshjen kundër Armenisë. Objektivi ynë është të kemi paraqitje serioze dhe të marrim rezultate pozitive, pasi këto ndeshje janë përgatitje për kualifikimet e ardhshme të Botërorit.”, u shpreh ai.
Ndeshja ndaj Armenisë do të zhvillohet më 6 qershor, ndërsa ajo ndaj Komoreve më 9 qershor, të dyja në orën 19:00 në stadiumin “Fadil Vokrri” në Prishtinë.
Këto miqësore do të shërbejnë si përgatitje për ciklin kualifikues të Kampionatit Botëror, i cili fillon në muajin shtator, ku Kosova bën pjesë në Grupin B së bashku me Zvicrën, Suedinë dhe Slloveninë. /Katror.info
Përgatiti:
