Në kryeqytetin e Kosovës u zhvillua Konferenca Rajonale për Fuqizimin e Grave Rurale në Ballkanin Perëndimor, e cila ofroi një platformë gjithëpërfshirëse për diskutim mbi sfidat dhe mundësitë e grave në zonat rurale të rajonit, raporton Ekonomia Online.
Magbule Hyseni, koordinatore nacionale e platformës për Kosovë, tha se gratë rurale përballen me sfida të përbashkëta, përfshirë qasjen e kufizuar në tokë, resurse financiare, tregje dhe vendimmarrje. “Megjithatë, ato mbeten shtylla kryesore e shoqërisë dhe ekonomisë rurale, duke ushqyer familjet dhe ruajtur traditat kulturore. Kjo platformë krijon hapësirë bashkëpunimi ku zërat e grave nga Kosova, Shqipëria, Maqedonia e Veriut, Mali i Zi, Serbia dhe Bosnja e Hercegovina bëhen më të fuqishme së bashku”, tha ajo.
Ndërkaq, Venera Çerkini, sekretare e Përgjithshme në Ministrinë e Bujqësisë, Pylltarisë dhe Zhvillimit Rural, foli për hapat që po ndërmerren në Kosovë për fuqizimin e grave në fshatra. Ajo theksoi se vetëm rreth 20 për qind e pronave janë në emër të grave, megjithëse politikat afirmuese kanë lehtësuar qasjen e tyre në grante dhe subvencione. “Kemi krijuar mekanizma mbështetës për investime, ngritje të kapaciteteve profesionale dhe përfshirje në zinxhirin e vlerës bujqësore. Megjithatë, sfidat mbeten, veçanërisht në pronësi, qasje në financa dhe punësim,” tha Çerkini.
Mundesh me e lexu edhe…
Koordinatorja rajonale e platformës, Biljana Petrovska-Mitrevska, prezantoi vizionin e platformës për promovimin e barazisë gjinore, avancimin ekonomik dhe rritjen e pjesëmarrjes së grave në vendimmarrje. Ajo theksoi se strategjia e platformës përfshin lobim, solidaritet rajonal dhe politika konkrete për fuqizimin e grave rurale./EO/Katror.info
