Kori i Fëmijëve-Okarina do të shënojë 10-të vjetorin e themelimit përmes një Gala Koncerti me artistë të shquar, me të cilët përgjatë kësaj dekade pjesëtarët e korit kanë pasur rastin të ndajnë skenën bashkë.
Sipas një njoftimi për media, ky koncert do të jetë një festë e veçantë e “Korit Okarina” me këngëtarët Sinan Vllasaliu, Irma Libohova, Adelina Thaçi, Adelina Paloja, Arbër Salihu, Adea Pula, Andra Rexhepi, Elona Sadiku, festë kjo e cila kurorëzon një dekadë punë, përkushtim, këngë, magji dhe emocione të paharrueshme, njofton Kori Okarina përmes një njoftimi në Facebook.
“Përgjatë këtyre viteve: Kemi kënduar në rreze të diellit, në shi të rrëmbyeshëm dhe në borë të pandalshme. Kemi qeshur e gëzuar, kemi qarë nga emocionet dhe sfidat që na kanë bërë më të fortë. Kemi kërcyer nga lumturia për sukseset tona dhe kemi ndarë magjinë e muzikës në çdo skenë, nga më e vogla tek më e madhja. Kemi udhëtuar me tingujt tanë, brenda dhe jashtë vendit, duke prekur zemra të panumërta. Kemi pasur nderin të performojmë me artistët më të mëdhenj dhe të jemi pjesë e institucioneve më të rëndësishme kulturore të vendit. Falë mbështetjes suaj dhe dashurisë për muzikën, kemi ndërtuar një shtëpi të veçantë ku çdo fëmijë ka gjetur frymëzim, buzëqeshje dhe hapësirë për të shkëlqyer. Faleminderit nga zemra për besimin dhe përkrahjen tuaj ndër vite,” shkruhet në postim.
Mundesh me e lexu edhe…
“Këtë 10-vjetor të jashtëzakonshëm do ta festojmë me një Gala Koncert me artistë të shquar me të cilët kemi patur rastin të ngjitemi në skenë, e që ky koncert do të mbetet gjatë në kujtimet tona.
Ju ftojmë të bëheni pjesë e këtij momenti të veçantë të cilin po e presim me padurim!Mirësevini në festën tonë”, thuhet në njoftim. Gala Koncerti mbahet më 22 dhjetor, në ora 19:00, në Shtëpinë e Kulturës “Xhavit Haziri”në Obiliq/ Katror.info
Përgatiti:
