Kosova ka arritur një moment të rëndësishëm në fushën e kërkimeve arsimore duke u bërë zyrtarisht Anëtare Kandidate në Shoqatën Evropiane të Hulumtimeve në Arsim (EERA), shkruan Katror.info.
“Me krenari të madhe njoftojmë se, nën udhëheqjen e Fakulteti i Edukimit / Faculty of Education- UP, Kosova ka marrë zyrtarisht Anëtarësimin si Kandidate në Shoqatën Evropiane të Hulumtimeve në Arsim (EERA)”, thuhet në njoftimin e Fakultetit të Edukimit.
Ky vendim u miratua nga Këshilli i EERA-s gjatë mbledhjes së tij më 14-15 mars 2025 në Berlin, pas një aplikimi të paraqitur nga Fakulteti i Edukimit i Universitetit të Prishtinës, në bashkëpunim me studiues dhe organizata të tjera të fushës.
Mundesh me e lexu edhe…
Në këtë proces kanë kontribuar hulumtues nga fakultetet e edukimit në Kosovë, Instituti Pedagogjik i Kosovës dhe organizata të shoqërisë civile, si Kosova Education Center (KEC), Teach For Kosova dhe ETEA.
Ky anëtarësim pritet të sjellë përfitime të shumta për studiuesit kosovarë, përfshirë qasje në tarifa të reduktuara për Konferencën Evropiane për Kërkime në Arsim (ECER), mundësi për rrjetëzim dhe bashkëpunim me studiues të tjerë evropianë, si dhe pjesëmarrje më aktive në 33 rrjetet kërkimore të EERA-s. Po ashtu, ky hap shihet si bazë për krijimin e një Shoqate Kombëtare të Kërkimeve Arsimore në Kosovë, e cila do të mund të forconte kapacitetet kërkimore dhe ndikimin në politikëbërje.
Shoqata Evropiane e Hulumtimeve në Arsim (EERA) përfshin mbi 40 organizata nga vende të ndryshme të Evropës dhe ka për synim të nxisë bashkëpunimin akademik, të përmirësojë cilësinë e hulumtimeve dhe të sigurojë këshilla të bazuara në kërkime për vendimmarrësit në fushën e arsimit.
Ky zhvillim konsiderohet një hap pozitiv për avancimin e kërkimeve arsimore në Kosovë dhe rritjen e dukshmërisë së studiuesve kosovarë në arenën ndërkombëtare./Katror.info
Përgatiti:
