Federata e Çiklizmit e Kosovës ka nisur sot garën ndërkombëtare “Tour of Kosova 2025”, një ngjarje sportive e kategorisë 2.2 të Unionit Ndërkombëtar të Çiklizmit (UCI), që do të zgjasë deri më 6 shtator, shkruan Katror.info.
Gara startoi nga sheshi “Ibrahim Rugova” në Prishtinë, duke vazhduar më pas nëpër autostradën “Ibrahim Rugova” dhe atë “Arbën Xhaferi”. Në këtë edicion po marrin pjesë 124 sportistë nga 16 shtete, duke e kthyer Kosovën në epiqendër të çiklizmit ndërkombëtar për disa ditë.
Ministri i Kulturës, Rinisë dhe Sportit, Hajrulla Çeku, shprehu mbështetjen e tij për ekipin kombëtar të Kosovës, duke theksuar rëndësinë që kjo garë ka jo vetëm për zhvillimin e sportit, por edhe për promovimin e imazhit të vendit dhe turizmit sportiv.
Mundesh me e lexu edhe…
“Me ekipin e Kosovës para fillimit të garës ndërkombëtare të çiklizmit ‘Tour of Kosova’, ku po marrin pjesë 16 shtete, 124 sportistë. Shumë suksese për garuesit tanë,” – ka shkruar Çeku në një postim në rrjetet sociale, ku ndau momente nga takimi me çiklistët kosovarë.
Pjesëmarrja e gjerë ndërkombëtare në këtë garë konfirmon rritjen e besueshmërisë dhe profesionalizmit në organizimin e ngjarjeve sportive në Kosovë, ndërkohë që çiklistët vendas kanë mundësinë të garojnë përkrah emrave të njohur të skenës botërore të çiklizmit./Katror.info.
