Ekipi i muaythait të Kosovës po merr pjesë në Kampionatin Botëror që po mbahet nga 24 deri më 31 maj 2025 në Antalia të Turqisë, për kategorinë senior dhe U-23. Garuesit Lindon Demiri, Arbos Maliqi dhe Erdonit Alija janë përfaqësuesit e Kosovës që synojnë ta sjellin medaljen e parë botërore në këtë sport për vendin tonë, shkruan Katror.info.
Ceremonia hapëse u mbajt të shtunën, ku në mesin e mbi 100 shteteve, flamuri i Kosovës u valua me krenari. Në ditët e para të garave, Erdonit Alija avancoi tutje pas diskualifikimit të kundërshtarit nga Kongoja, ndërsa kampioni evropian Lindon Demiri, megjithë paraqitjen e fortë, u ndal nga lëndimi në raundin e tretë në përballje me Elvin Mammadov të Azerbajxhanit.
Kryetari i Federatës së Muaythait të Kosovës, Shpejtim Ahmetaj, u shpreh krenar për përfaqësimin dhe zbuloi se Kosova po punon intensivisht për të siguruar organizimin e Kampionatit Botëror të vitit 2026 në Prishtinë. Pas suksesit në organizimin e Kampionatit Evropian vitin e kaluar, Kosova është tashmë një ndër favoritët për mikpritjen e evenimentit më të madh të këtij sporti.
Mundesh me e lexu edhe…
Federata e Muaythait e Kosovës, e themeluar në vitin 2019, ka shënuar hapa të mëdhenj në zhvillimin dhe afirmimin e këtij sporti në skenën ndërkombëtare./Katror.info
