Në Kosovë ka nisur fushata globale “16 ditët e aktivizmit kundër dhunës me bazë gjinore” dhe gjatë kësaj periudhe, institucionet shtetërore e organizatat e shoqërisë civile organizojnë një sërë aktivitetesh për ndërgjegjësimin kundër dhunës me bazë gjinore.
Ministrja e Drejtësisë, Albulena Haxhiu, sot mori pjesë në orën e parë në shkollën “Ahmet Gashi” në Prishtinë. Në të gjitha shkollat në mbarë vendin, ora e parë iu kushtua ndërgjegjësimit kundër dhunës me bazë gjinore. Haxhiu iu tha nxënësve se dhuna, asnjëherë nuk është e pranueshme dhe se nuk duhet të kthehet me dhunë por të raportohet.
“Ministria e Drejtësisë e ka përgjegjësinë që të adresojë politikat për adresimin e dhunës në familje dhe dhunës me bazë gjinore. Deri tani kemi ndërmarrë shumë veprime të cilat kanë për qëllim që të rehabilitojnë personat të cilët bëjnë veprime të tilla, pra kryejnë dhunë në familje apo janë të dhunshëm në ambientin familjar, sikurse kemi ndërmarrë shumë veprime që kanë për qëllim që viktimave t’iu ofrohen shërbime që u nevojiten, tha Haxhiu.
Mundesh me e lexu edhe…
“Shteti ofron ndihmë juridike falas për viktimat e dhunës në familje, teksa po ashtu ka ndërmarrë hapa për dënime plotësuese për personat që shpallen fajtorë për dhunë në familje dhe dhunë seksuale. Ata mund të dënohen me dënim plotësues nga Gjykata që do t’iu pamundësonte punësimin në institucionet shtetërore. Dhuna nuk është zgjidhje,” ka thënë ajo.
Në anën tjetër, Rrjeti i Grave të Kosovës (RrGK), me rastin e fillimit te fushatës globale “16 Ditët e Aktivizmit Kundër Dhunës me Bazë Gjinore”, rithekson përkushtimin që kjo betejë të mos kufizohet në këto ditë simbolike, por të jetë një angazhim i përditshëm, për 365 ditë të vitit.
“Dhuna me bazë gjinore mbetet forma më e përhapur e dhunës në botë, që prek miliona gra dhe vajza çdo vit, duke shkelur të drejtat e tyre themelore për një jetë të lirë e të sigurt.”
Sot, RrGK do të përfaqësohet nga menaxherja e Programit Kundër Dhunës me Bazë Gjinore, Adelina Berisha, në hapjen e aktiviteteve të organizuara nga Ministria e Drejtësisë. Ky është vetëm një moment për të riafirmuar nevojën për veprim të përbashkët dhe të pandërprerë kundër dhunës me bazë gjinore.
“Lufta kundër dhunës me bazë gjinore është përgjegjësi e të gjithëve – çdo ditë, çdo muaj, çdo vit,” ka shkruar RrGK ne Facebook.
Nëse po përballeni me ndonjë formë të dhunës, raportojeni sulmuesin! Thirreni Policinë e Kosovës në numrin 192! Po ashtu, Rrjeti i Grave të Kosovës ofron këshillim ligjor dhe përfaqësim falas.
Nëse jeni viktimë e dhunës me bazë gjinore apo njihni dikë që është viktimë e dhunës me bazë gjinore, telefononi në numrin e telefonit 048 105 800.
Format e dhunës me bazë gjinore janë vepër penale dhe të ndëshkueshme me Kodin Penal të Republikës së Kosovës.
Fushata globale “16 ditët e aktivizmit kundër dhunës me bazë gjinore” nis në Ditën Ndërkombëtare për eliminimin e dhunës ndaj grave” dhe përfundon më 10 dhjetor, në Ditën e të drejtave të njeriut.
Raporto rastet e dhunës në familje: 0800 19 999
Numri kontaktues i Mbrojtësve të Viktimave: 0800 11 112
Numrat kontaktues të shtëpive të sigurta: 0800 800 01 dhe 0800 21 000
Raporto rastet e dhunës në Policinë e Kosovës: 192/Katror.info
Përgatiti:
