Kombëtarja e Kosovës në futboll për femra do të zhvillojë sot një nga ndeshjet më të rëndësishme të këtij cikli, duke u përballur me Turqinë në stadiumin “Fadil Vokrri” në Prishtinë.
Takimi zhvillohet në kuadër të fazës së “play-off-it” të Ligës së Kombeve, ku në dy përballje do të vendoset se cila kombëtare do të garojë në edicionin e ardhshëm në Ligën B.
Për vajzat dardane, kjo përballje ka rëndësi të madhe sportive dhe pritet të jetë një sfidë e fortë ndaj një kundërshtari me përvojë.
Mundesh me e lexu edhe…
Përzgjedhësi i Kombëtares së Kosovës, Sami Sermaxhaj, ka deklaruar se ekipi është përgatitur maksimalisht për këtë sfidë dhe beson në një rezultat pozitiv.
“Ne presim që planifikimet që i kemi bërë, si në aspektin e përgjithshëm ashtu edhe në atë specifik, të shihen brenda vijave të fushës dhe të na sjellin rezultat pozitiv. Kemi bërë një analizë të detajuar të kundërshtarit, si unë ashtu edhe futbollistet. Synimi ynë është të jemi sa më sulmues, të krijojmë më shumë raste dhe të jemi efektive në finalizim. Pres përkushtim maksimal dhe fokus 100%. Vajzat janë të vetëdijshme për rëndësinë e lojës dhe shpresoj që si produkt i punës sonë të dalim nesër fitues,” ka thënë Sermaxhaj.
Ndeshja Kosovë–Turqi do të zhvillohet sot me fillim nga ora 17:00, në stadiumin “Fadil Vokrri” në Prishtinë./Katror.info
