Nuk dihet ende nëse Prishtina do të mund të marrë rreth 74 milionë euro grant-kredi nga Banka Zhvillimore Gjermane, të parapara për kompaninë rajonale të mbeturinave “Pastrimi”. Siç raporton RTK, Komuna e Prishtinës nuk po pajtohet me kushtet e Bankës Gjermane, përkatësisht me kushtin që Kompania “Pastrimi” të operojë si e vetme.
Siç raporton televizioni publik, kryetari i Prishtinës, Përparim Rama synon angazhimin e një operatori privat për menaxhimin e mbeturinave, me pretendimin se “ndërmarrja “Pastrimi” nuk mund të ofrojë shërbime cilësore vetëm.”
Kryeshefi ekzekutiv i “Pastrimit” Petrit Reçica, thotë se i kanë plotësuar të gjitha kushtet e nevojshme për ta përfituar grantin.
Mundesh me e lexu edhe…
“Jemi zotuar për një varg kërkesash që kanë qenë të adresuara, të gjitha i kemi plotësuar si kompani, ndërsa nga ana e komunës ka qenë një kërkesë, ajo garanca e një kontrate 10 vjeçare. Investimi jepet vetëm në ndërmarrjen publike ‘Pastrimi’ dhe në asnjë formë në operatorët privatë”, tha Reçica.
Reçica ka treguar se çfarë do të përfitonte kompania dhe qytetarët nga ky grant.
“Do të blihen pajisje të reja, do të ketë objekte të reja. Kështu e parasheh projekti. Do të jetë një objekt i ri, do të jenë kamionë të rinj. Investimet kapitale në infrastrukturë, dhe mbi të gjitha në mekanizëm,” tha ai.
Nga Komuna e Prishtinës thanë se nuk kanë arritur ujdi me Bankën Zhvillimore Gjermane pasi mendojnë se “Pastrimi” si kompani e vetme nuk do të arrijë të ofrojë shërbime cilësore.
Bekim Brestovci, drejtor i Shërbimeve Publike në Komunën e Prishtinës, tha se deri në realizimin e kësaj marrëveshje duhet të kontraktojnë edhe operator privat. “Ndërsa ata pretendojnë që ne që nga tani tërë territorin ta lëmë në menaxhim të ndërmarrjes ‘Pastrimi’, gjë për të cilën ne, për shkak të pamundësisë së ndërmarrjes ‘Pastrimi’, nuk kemi qenë në pajtueshmëri me ta,” tha ai.
Opozita në Prishtinë fajëson të dyja palët. Gëzim Sveçla, shefi i asamblistëve të LVV-së në Prishtinë, tha se dihet botërisht qëllimi i LDK-së. “Konkretisht të kabinetit Rama, për ta ndarë tregun e pastrimit në disa operatorë ekonomikë privatë, gjë që ne mendojmë se do të çojë në bankrotimin e kompanisë ‘Pastrimi’. Në anën tjetër, nuk jemi aspak të kënaqur as me menaxhimin që bëhet përbrenda vetë ndërmarrjes,” tha ai.
RTK provoi të marrë një qëndrim edhe nga asamblistë të LDK-së në kryeqytet, por shefja e tyre, Jeta Rafuna, tha se nuk do të prononcohen për televizionin.
Menaxhimi i mbeturinave në kryeqytet ka përplasur disa herë udhëheqësit e kompanisë “Pastrimi”, ish-funksionarë të PDK-së, me kryetarin e kryeqytetit, Përparim Ramën./Katror.info
Përgatiti:
