Kryeministri britanik Keir Starmer tha se do të dëshironte të bëjë Mbretërinë e Bashkuar një ‘superfuqi’ të Inteligjencës Artificiale (AI), duke premtuar të marrë një qasje pro-inovative në rregullim, të bëjë të disponuesheme të dhënat publike për studiuesit dhe të krijojë zona për qendrat e të dhënave.
Starmer, i cili pritet të ketë pak mundësi për të shmangur prerjen e shpenzimeve pas rritjes së kostove të huamarrjes, tha se dëshironte të vendosë inteligjencën artificiale në zemër të ambicieve të tij për të rritur ekonominë, shkruan Reuters, përcjell Katror.info.
Qeveria thotë se teknologjia mund të rrisë produktivitetin me 1.5% në vit, duke sjellë një rritje prej 47 miliardë paund [57 miliardë dollarë] në vit, gjatë një dekade.
Mundesh me e lexu edhe…
“Britania do të jetë një nga superfuqitë e mëdha të inteligjencës artificiale,” tha ai të hënën në Universitetin e Kolegjit të Londrës, duke theksuar se vendi tashmë ishte lideri evropian për investimet në Inteligjencë Artificiale.
“Ne do të bëjmë përparime, do të krijojmë pasuri dhe do ta bëjmë inteligjencën artificiale të funksionojë për të gjithë në vendin tonë” tha ai.
Vendet e ndryshme të botës po konkurrojnë për t’u bërë qendra të inteligjencës artificiale, duke balancuar nxitjen për rritje me nevojën për disa kufizime mbi teknologjinë.
Ekonomia e gjashtë më e madhe në botë, Britania renditet pas Shteteve të Bashkuara dhe Kinës, kur matet nga tregues si investimet në AI, sipas Universitetit të Stanfordit.
Starmer tha se Britania do të ndjekë një rrugë ‘për rritje dhe për inovacion’ në rregullim.
“Di se ka qasje të ndryshme në mbarë botën, por tani jemi në kontroll të regjimit tonë rregullator, prandaj do të ndjekim rrugën tonë në këtë aspekt,” tha ai, duke iu referuar largimit të Britanisë nga Bashkimi Evropian në vitin 2020.
“Ne do ta testojmë dhe do ta kuptojmë inteligjencën artificiale para se ta rregullojmë, për t’u siguruar që kur ta bëjmë këtë, do të jetë në mënyrë proporcionale dhe të bazuar” potencoi ai.
”Britania do të vendosë të dhënat publike, si informacionet nga shërbimi shëndetësor shtetëror, në një ‘Bibliotekë Kombëtare të të Dhënave’, të cilat do të jenë të qasshme për studiuesit, duke respektuar rregullat besuese për të drejtat e autorit”, tha ai.
Qeveria do të pranojë gjithashtu të gjitha 50 rekomandimet e paraqitura në raportin ‘Plani i Veprimit për Mundësitë e AI’, nga kapitalisti Matt Clifford, tha Starmer.
Kjo përfshin lehtësimin e ndërtimit të qendrave të të dhënave duke përshpejtuar miratimin e planeve dhe duke u dhënë atyre lidhje me energjinë. Qendra e parë e tillë do të ndërtohet në Culham, Oxfordshire, ku ndodhet Autoriteti i Energjisë Atomike të Britanisë.
Ekonomia e Britanisë ka nevojë urgjente për një impuls të ri, pas buxhetit të qeverisë së Laburistëve që ka rritur taksat në nivelin më të lartë që nga viti 1993 dhe ka dëmtuar besimin në biznes.
Po ashtu, Banka e Anglisë vlerësoi muajin e kaluar se ekonomia nuk ka pasur rritje në çerekun e fundit.
Starmer tha se inteligjenca artificiale ka fuqinë të transformojë jetën e njerëzve, përfshirë përshpejtimin e konsultimeve për planifikimin e planeve, ndihmën për bizneset e vogla dhe reduktimin e barrave burokratike për mjekët dhe mësuesit. /Katror.info
Përgatiti:
